ने. सं. ११४४ ञलाथ्व दशमी -

न्हय्गुलिं प्रदेशया प्रमुख बर्खास्त

सरकारया स्पिड कथं ज्या याये मफुगु द्वपं

येँ – सरकारं न्हय्गुलिं प्रदेशया प्रमुखपिंत बर्खास्त याःगु दु । म्हिगः च्वंगु मन्त्रिपरिषदया बैठक लिपा सरकारया सिफारिसय् राष्ट्रपति विद्यादेवी भण्डारीं प्रदेश प्रमुखपिंत बर्खास्त याःगु खः । न्हय्गुलिं प्रदेशया प्रमुखयात निगू तिहाइ सरकारया स्पिड कथं ज्या याये मफुगुलिं चीकूगु खँ सांसद लिसें नेकपाया नेता कृष्णगोपाल श्रेष्ठं ‘नेपालभाषा टाइम्स’ यात कनादीगु दु ।

वय्कलं प्रदेश प्रमुखपिंसं सरकारया गति कथं ज्या याये मफुगु धासें उमित ससम्मान चीकूगु जानकारी बियादीगु खः । वय्कलं आःया प्रदेश प्रमुखपिं पुलांगु सरकारं नियुक्ति याःगु व वर्तमान सरकारया गुगु स्पिडं ज्या यायेमाःगु खः उलि ज्या मयाःगुलिं चीकेमाःगु खँ कनादीगु दु ।

थ्वहे झ्वलय् राष्ट्रपति भण्डारीया स्वकीय सचिव भेषराज अधिकारीं मन्त्रिपरिषदया सिफारिस कथं न्हय्गुलिं प्रदेशया प्रमुखपिंत बर्खास्त याःगु खँ पुष्टि यानादीगु दु । राष्ट्रपति कार्यालयया कथं संविधानया धारा १६५ या उपधारा १ या खण्ड कथं प्रदेश प्रमुखपिंत पदमुक्त याःगु खः ।

बर्खास्त जूपिं प्रदेश १ या प्रा.डा. गोविन्दबहादुर तुम्बाहाङ, २ या रत्नेश्वरलाल कायस्थ, ३ या अनुराधा कोइराला, गण्डकी प्रदेशया प्रमुख बाबुराम कुँवर, प्रदेश ५ या उमाकान्त झा, कर्णाली प्रदेशया दुर्गाकेशर खनाल व सुदूरपश्चिम प्रदेशया प्रमुख मोहनराज मल्लपिं खः ।

थ्व स्वयां न्ह्यः शेरबहादुर तामाङ कानुन मन्त्री जूगु इलय् नं प्रदेश प्रमुखपिंत चीकेगु सहमति जूगु खःसां नं चीकेत मफयाच्वंगु खः । २०७४ साल माघ ३ गते नेपाली कांग्रेस नेतृत्वया शेरबहादुर देउवा सरकारं प्रदेश प्रमुखपिं नियुक्त याःगु खः ।