ने. सं. ११४४ कौलाथ्व सप्तमी - फूलपाती

नेवाः ज्ञानकोश दयेकेत ग्वाहालि याःपिंत सम्मान

यल (नेपालभाषा टाइम्स)- नेवाः सांस्कृतिक ज्ञानकोश पिथनेगु निंतिं थीथी कथं ग्वाहालि यानादीपिंत च्वछायापौ लःल्हाःगु दु । सोमवाः यलया केशवनारायण चुकय् जूगु छगू ज्याझ्वःया दथुइ ज्ञानकोशय् थीथी च्वसु च्वयादीपिंत कवः कजिपिंसं च्वछायापौ लःल्हानादिलसा ज्ञानकोश पिथनेगु निंतिं ज्या यानादीपिं कवः कजि, कमिटीया दुजः, सचिवालय दुजः, परियोजना प्रमुख, परियोजना सहायकपिंत नेपालभाषा एकेदेमिया चान्सलर यज्ञरत्न धाख्वाःनं च्वछायापौ लःल्हानादिल ।

येँ महानगरपालिकाया ग्वाहालिं नेपालभाषा एकेदेमिपाखें पिदंगु नेवाः सांस्कृतिक ज्ञानकोश न्यागू खण्डय् पिदंगु खः । थीथी खण्डया कजिपिं डा. चुन्दा वज्राचार्य, उप.प्रा. मदनसेन वज्राचार्य, त्रिरत्न मानन्धर, विश्व शाक्य व शाक्य सुरेनपिंसं ज्ञानकोशया निंतिं च्वज्या यानादीपिं थ्यंमथ्यं सछि व नीन्याम्हेसित च्वछायापौ लःल्हानादीगु खः ।

ज्याझ्वलय् न्ववानादिसें ज्ञानकोशया मू परिकल्पनाकार व एकेदेमिया भाइस चान्सलर मल्ल के सुन्दरं ज्ञानकोशय् यक्व मगाःमचाः दनिगु, त्वःफिना च्वंगु दनिगुलिं उकियात मेमेगु संस्करणय् कःघाना यंकेगु खँ धयादिल । अथेहे वय्कलं आः पिदंगु ज्ञानकोशय् छुं छुं गल्ती नं खनेदुगुलिं उकियात नं मेगु संस्करणय् भिंका यंकेगु प्रतिबद्धता प्वंकादिल ।

ज्ञानकोशया दयेकेगु ज्याया बारे कनादिसें वय्कलं धयादिल, ‘जिमिसं थ्व ज्या न्ह्याकाबलय् हे यक्व मगाःमचाः दइ धयागु वाःचाःगु खः । तर मगाःमचाः दइ धकाः सुंक च्वनाः मजिल, ज्या ला न्ह्याके हे माल । यदि मगाःमचाः दइ धकाः सुनां नं ज्या मयात धाःसा थज्याःगु तःजिगु ज्या जुइगु सम्भव जुइमखु, उकिं न्ह्याथें ज्याःगु मगाःमचाः दुसां उकियात बुलुहुं भिंकाः वनेगु, मगाःमगाःया दोष एकेदेमिं हे कुबिया वनेगु क्वःछिनाः ज्या न्ह्याकागु । थ्व हे कारणं थौं थुलि तक झीसं पिकायेफत, आः थुकियात अझ बांलाका यंकेगु ज्या निरन्तर जुया वनी ।’

अथेहे ज्याझ्वलय् न्ववानादिसें ज्ञानकोश परियोजनाया निर्देशन समितिया कजि डा. योगेन्द्रमान प्रधानं नेवाःतय्बारे विस्तृत रुपं जानकारी कायेगु निंतिं झीके छगू तःजिगु प्रकाशन दुगु खँ न्ह्यथँसें धयादिल, ‘थ्व आःया निंतिं नेवाःतय्त म्हसीकेगु, नेवाःतय् बारे पूवंक जानकारी कायेगु सफू जक जूगु दु, थुकियात अझ वृहत रुपं दयेकेगु ज्या यायेमाःगु दु ।’

थ्व झ्वलय् वय्कलं थ्व ज्ञानकोशया नेपाली, अंग्रेजीं अनुवाद यायेगु बारे नेवाःतय्सं कपाः स्याका च्वनेम्वाःगु खँ न्ह्यथँसें धयादिल, ‘झीसं झीगु बारे पूवंक जानकारी दुगु ज्ञानकोश पिथने धुनागु दु, आः नेवाःतय् बारे गैरनेवाःतय्सं सिइकेगु थुइकेगु खःसा उमिसं लगानी यानाः थुकिया अनुवाद याकेमाः । नेपाल एकेदेमि, साझा प्रकाशन थेंज्याःगु संस्था थुकिया अनुवाद यायेगु निंतिं न्ह्यःने वयेमाः, नेवाःतय्सं ध्यबा पानाः अनुवाद यानाच्वनेमाःगु मदु । बरु नेवाःभासं अझ वृहत् कोश दयेकेगु पाखे न्ह्याः वनेमाः ।’

एकेदेमिया प्राज्ञ व निर्देशन समितिया दुजः त्रिरत्न शाक्यं लसकुस यानाः न्ह्याःगु ज्याझ्वः एकेदेमिया चान्सलर यज्ञरत्न धाख्वाःया सभापतित्वय् जूगु खः ।