शुक्रवाः तक मनसुन सक्रिय

येँ (नेपालभाषा टाइम्स) – नेपालय् वइगु शुक्रवाःतक मनसुन सक्रिय जुयाः वा वयाच्वनी तिनिगु खँ धाःगु दु । मौसमविद् मञ्जु बासीं राससलिसे खँ ल्हासें सोमवाः चान्हय् निसें सक्रिय जूगु मनसुन शुक्रवाः तकं सक्रिय जुइगु खँ धयादीगु खः । ‘मनसुनया न्यूनचापीय रेखा नेपाःया तराई भुभाग लिक्क दुगुलिं हाकनं मनसुन सक्रिय जुयावःगु खः’ वय्कलं धयादीगु दु ।

सोमवाःनिसें मनसुन सक्रिय जूगुलिं देय्या फुक्क धयाथें थासय् हल्का, मध्यम वर्षा जुयाच्वंगु दुसा गुलिखे थासय् तसकं वा वयाच्वंगु दु । मनसुन सक्रिय जुयाच्वंगुलिं खुसिइ लः अप्वयेफुगु, पहाडय् भूक्षय जुयाः चलः वनेफुगु, सतक व हवाइ यायतायात प्रभावित जुइफुगु, बांलाःगु निकास मदुगु धः दुथाय् डुबान जुइफुगुलिं सचेत जुइत मौसम पूर्वानुमान महाशाखां धाःगु दु ।

मौसम पूर्वानुमान महाशाखां म्हिगः स्वनिगलय् ८.७ मिलिमिटर वा वःगु व दकलय् अप्वः धनकुटाय् १२६.५ मिलिमिटर वा वःगु खँ धाःगु दु ।