लोकसेवा विज्ञापन बारे आइतवाः सुनुवाई

येँ – सर्वोच्च अदालतय् दायर जुयाच्वंगु लोकसेवा आयोगया स्थानीय तहया कर्मचारी नियुक्ति सम्बन्धी विज्ञापनया विवादयात कयाः हाकनं आइतवाः सुनुवाई जुइगु जूगु दु । न्यायाधीशद्वय हरिकृष्ण कार्की व डा.ईश्वरप्रसाद खतिवडाया मंकाः इजलासय् म्हिगः सुनवाई याःगु खःसां नं विपक्षी मध्ये छगू पक्ष प्रतिनिधिसभाया राज्य व्यवस्था समितियात सुचं मवंगुलिं आइतवाः तकया निंतिं स्थगित याःगु खः ।

लोकसेवा आयोग विरुद्ध स्थानीय तहया विज्ञापन सम्बन्धी प्यंगू रिट लानाच्वंगु खःसा वंगु असार ८ गते निसें सुनुवाइ न्ह्याःगु खः । तर बहस क्वमचाःगुलिं म्हिगः ‘हेर्दाहेर्दै’ या धलखय् तःगु खः । थ्व स्वयां न्ह्यः न्यायाधीशपिनि उगु हे इजलासं थ्वहे वंगु असार ४ गते दायर जूगु फुक्कं विवादयात छगू हे इजलासय् तयाः सुनुवाइ यायेत आदेश बिउगु खः ।

लोकसेवा आयोगं वंगु जेठ १५ गते देय्न्यंकंया ५१५ गू स्थानीय तहया ९१६१ गू सिटया निंतिं विज्ञापन याःगु खःसा उगु विज्ञापन समावेशी मजू धासें रिट दर्ता याःगु खः । लिसें लोकसेवा विज्ञापन–यात कयाः आदिवासी जनजाति संगठनतय्सं माइतीघर मण्डलाय् न्हिथं प्रदर्शन नं याना वयाच्वंगु दु ।