भूमि आयोग फ्वँसें सुकुम्बासी प्रदर्शन

येँ – भूमि सम्बन्धी समस्या समाधान यायेत धकाः गठन यानातःगु भूमि आयोग खारेज याःगु खँय् विरोध यासें म्हिगः येँया कोटेश्वरय् छगू प्रदर्शन जुल । प्रदर्शन याःपिं मनूतय्सं थःपिंत भूमिहिन पीडितपिं धकाः धाःगु खःसां उकिया नेतृत्व धाःसा एमालेया सांसद शान्ता चौधरीं यानादीगु खः ।

प्रदर्शनकारीतय्सं सरकारं खारेज याःगु भूमि आयोग पुनस्र्थापना यायेमाःगु माग याःगु खः । उमिसं सकलें भूमिहिन सुकुम्बारी, अव्यवस्थित वसोवासी छप्पँ जुइ नु धइगु नारा थ्वयेका वःगु खः । प्रदर्शनया नेतृत्व यानादीम्ह चौधरी नेपाल भूमिहिन सुकुम्बासी संगठनया अध्यक्ष नं खः । वय्कलं भूमि आयोग हानं गठन यानाः भूमिहिनया समस्या समाधान मयात धाःसा अझ कडा कारवाही जुइ धकाः नं ख्याच्वः बियादीगु दु ।

थ्व भूमि आयोग पुलांम्ह प्रधान–मन्त्री केपी ओलीया सरकारं गठन याःगु खः । थ्व आयोगं भूमिहिन सुकुम्बासी–तय्त शहरी लागाय् म्हतिं ४–४ आना जग्गा बीगु धकाः नं हल्ला याःगु खः । स्वनिगः दुने हे सुकुम्बासीतय्त जग्गा बीगु धकाः खँ वःगुलिं स्वनिगःया स्थानीय जनतां धाःसा थ्व आयोगया विरोध याना वयाच्वंगु खः ।