ग्रिसय् अपहरण, नेपालय् फिरौती माग
येँ (नेपालभाषा टाइम्स)÷ युरोपेली देय् ग्रिसय् नेपाःमित अपहरण यानाः येँय् फिरौती काःपिं प्यम्हेसित प्रहरीं ज्वंगु दु । थुमिसं सुलाः सुलाः ग्रिस दुहां वंपिं सावित्रा थापा, कृष्ण कार्की व राजन सत्याल नांया नेपाःमितय्त वंगु साउन २८ गते अपहरण याःगु खः । थुकिया जानकारी वयेवं प्रहरीं इन्टरपोलयात खबर यानाः विशेष अपरेशन न्ह्याकूगु खः ।
वहे झ्वलय् अपहरितपिनि छेँजःपाखें २१ लाख ७५ हजार तका फिरौती बुझे याःगु खः । फिरौती कायेधुंकाः नेपाःया ई कथं चान्हय् ११ बजे अपहरणय् लाःपिंत मुक्त याःगु खः ।
प्रहरीया कथं थ्व नेपाःमितय्त पाकिस्तानीतय्सं अपहरण याःगु खः । तर फिरौती धाःसा दुबईलय् ज्या यानाच्वंपिं दिलबहादुर थापा व प्रकाश बेलबासें फ्वंगु खः । भदौ २ गते येँया गौरीघाटय् फिरौतीया ध्यबा काः वःबलय् शिवराज कुँवर व रामेश्वर अर्यालयात प्रहरीं ज्वंगु खः ।
LEAVE YOUR COMMENTS