‘थ्व पालय् स्वन्ति, स्वन्ति थें मच्वन, लुमंति जक ल्यन’
श्लोक सिंह श्रेष्ठ
नमूना आवासीय मावि,
कक्षा ८, पर्वत कुस्मा
मोहनि लिपा दकलतय् तःधंगु नखः स्वन्ति नेपाःमितय् छगू विशेष नखः खः । क्वःपुजा निसें किजापुजा तक यानाः स्वन्ति नखः न्यान्हु तक हनी ।
जिमिगु स्कुलय् मोहनि निसें हे स्वन्ति तक बिदा जुइ । स्वन्ति सुरु जुइवं हे जिपिं पासापिं जानाः देउसी भैली म्हितः वनेगु, पटका मुइकेगु । न्हापा न्हापा थथे याःसां थुगुसी जिं देउसी भैला म्हितः वनेमखन, छाय्कि थ्व दँय् जिक येँय् हे जुल ।
मां नं छेँ थुगुसी नं सेल मरि, न्हूगु वसःया लिसें पटाका न्हापा लिपा थें न्यानाबिउगु दु । थ्व पालय् जिं येँय् हे च्वनाः म्हिता । न्हापा थें थुगुसी पर्वतय् च्वंगु जिमिगु छेँय् मत तयाः झिलिमिलि मयाः । जि थः हे तताकेहेँपिं मदुगुलिं न्ह्याबलें निनिअजिया ल्हाः किजापुजा यायेत बाग्लुंगय् वनेगु याना वयाच्वनागु खः । गुबलें गुबलें तःकेहेँपिं सुं मदु धकाः म्हाइपुसे च्वनीगु । अथे खःसां न्ह्याबलें स्वन्तिबलय् मन लय्ताइगु व कपाः नं खाली मजुइगुलिं आनन्द हे जुइगु जुयाच्वन ।
स्वन्ति नखःया कन्हय्कुन्हु हे जिगु जन्मन्हि नं जूगुलिं झन् न्ह्याइपुसे च्वनीगु, तर थ्व पालय् कन्हय् कुन्हु हे मलात । न्ह्याबलें स्वन्ति व जन्मन्हि नापनापं लाइगु स्वन्ति नखः जिगु निंतिं खास जुइगु खः ।
म्ह पुजा यायेबलय् बिस्कं हे आनन्द वः । अझ निनिअजिं सिन्हः तिकाः स्वां सिन्ह तयाः छ्यनं निसें घ्वाल्ल सिफं लुइबलय् झन हे मन लय्ताइगु । जि ख्वःसिं, स्यांगुलि बय्लि मालेगु स्वयेगु । म्हपुजा कुन्हु हे गुबलय् कन्हय् जुइ, अले यक्व सेल नकाः, म्वःसिप्वः, न्हूगु लँ, पटका बियाः ग्वय्स्वांमाः क्वखायको बी धकाः बिचाः याना च्वनेगु । तर थ्व पालय् न्हापा न्हापा थें मजुल, स्वन्ति लुमंतिइ हे जक ल्यन । स्वन्तिया न्हि कुन्हु सुथय् चिकुसे च्वनीगुलिं अजिं क्वःलखं म्वःल्हुया वा धाइगु । जि सुथन्हापनं हे क्वाःलखं म्वःल्हुयाः न्हूगु वसः पुनाः तयार जुयाच्वनेगु ।
जिपिं अजा, ड्याडी दक्वं नापं च्वनेगु, छाय्कि जिपिं सकसितं निनिअजिं हे सिन्हः तिकेगु याना वयाच्वंगु खः । छाय्धाःसा जिमि ड्याडीया नं तःकेहेँ मदु । स्वां, सिन्हः, चन्दन आदि तयाः पुजा यायेगु जुइ । जिपिं च्वनेगु थाय्या न्ह्यः अजां बांलाक मन्दः दयेकाबी । अन हे अजिं पुजा याइ, अले जिमित सगं कथं धौ बियाः सिन्हः तिकाबी ।
थ्व पालय् अजा मदुगुलिं मोहनि स्वन्ति थेंज्याःगु नखःचखः हनेमखन । थज्याःगु नखःचखः वइबलय् थःम्हं ब्वना वयाच्वनागु सामाजिक विषयं नं झीगु थःगु धर्म, संस्कार, रितिरिवाजया बिस्कं महत्व दु धयागु अझ अप्वः थुइकेखंगु दु ।
LEAVE YOUR COMMENTS