डिस्को किङ बप्पी लहरी मंत

एजेन्सी- भारतया नांजाःम्ह म्येहालामि व संगीतकार बप्पी लहरी मंत । मंगलवाः बहनि भारतया मुम्बइया जूहुइ च्वंगु क्रिटी केयर अस्पतालय् लहरी ६९ दँया वैंशय् मदुगु खः । लछि तक अस्पताल वासः याकेधुंकाः लहरी सोमवाः तिनि अस्पतालं डिस्चार्ज जूम्ह खः । तर हाकनं मफयावयेवं वयात अस्पातालय् यंकूगु खः ।

सन् १९५२ य् बूम्ह लहरीया खास नां आलोकेश लाहिडी खः । लहरीं सत्तरी व असीया दशकय् यक्व हे चर्चित फिल्मया चर्चित म्येँय् संगीत बिउगु खः । डिस्को डान्सर, चलते चलते, सराबी लहरीया छुं हिट फिल्म खः । लहरीं दकलय् लिपा बागी ३ य् संगीत बिउगु खः । बलिउड जक मखुसें लहरीं हलिउडय् नं संगीत बिउगु दु । बलिउड संगीतयात डिजिटल यायेत लहरीया तःधंगु योगदान दु ।

लहरी सन् २०१४य् बीजेपीं राजनीतिइ दुहा वंगु खः । सन् २०१४ य् जूगु लोक सभा चुनावय् लहरीं उम्मेदवारी बिउगु खः तर चुनाव धाःसा मत्यात ।

सम्बन्धित बुखँ

LEAVE YOUR COMMENTS