अमेरिका व फ्रान्सया दथुइ सम्बन्ध सुधारया निंतिं वार्ता

एजेन्सी- अमेरिका, बेलायत व अस्टे«लियाया दथुइ जूगु सुरक्षा सम्झौता अकसं यानाः स्यनावंगु सम्बन्ध सुधारया निंतिं अमेरिका व फ्रान्सया दथुइ वार्ता जूगु दु । अमेरिकाया राष्ट्रपति जो बाइटडेन व फ्रान्सया राष्ट्रपति इम्यानुएल म्याक्रो दथुइ बुधवाः टेलिफोन वार्ता जूगु खः । वार्ता लिपा निम्हं राष्ट्रपतिं मंकाः वक्तव्य जारी यानाः समस्या समाधानया कुतः यायेगु व युरोपया सुरक्षा बल्लाकेगु निंतिं सहकार्य जुइ धाःगु दु ।

वार्ताय् अमेरिकाया राष्ट्रपति बाइडेनं हिन्द प्रशान्त क्षेत्रय् फ्रान्स व युरोपियन युनियनया संलग्नता महत्वपूर्ण जूगु धाःगु खः । अथे हे मेगु महिनाय् निम्हेसिया दथुइ वार्ता नं जुइगु जूगु दु । वार्ता लिपा फ्रान्सया राजदूत अमेरिका लिहां वनीगु जूगु दु । अकस सुरक्षा सम्झौता जुइवं फ्रान्सं अमेरिका व अस्टे«लियां थःपिनि राजदूत लित सःतूगु खः ।

अस्टे्लियां नं फ्रान्सलिसे वार्ता यायेत स्वयाच्वंगु दु । अस्टे«लियाया प्रधानमन्त्री स्कट मोरिसनं फ्रान्सलिसे वार्ताया निंतिं कुतः जुयाच्वंगु, तर सफल धाःसा मजूनि धाःगु दु । प्रधानमन्त्री मोरिसनं फ्रान्सलिसे सम्बन्ध सुधार यायेत धैर्य तयाः ज्या यानाच्वनागु नं धाःगु दु । अकस सम्झौतां यानाः फ्रान्स व अस्टे«लियाया दथुइ जूगु ५० बिलियन अस्टे्रलियन डलरया पनडुब्बी सम्झौता रद्द जूगु खः ।