अले सी दइ !

प्रम ओलीं नेपालय् भारतं सांस्कृतिक अतिक्रमण याःगु खँ पित हल । राम मूलतः नेपालवासी खः । अयोध्या नेपालय् लाः । ठोरीपाखे ।
थज्याःगु तथ्यसत्ययात क्वत्यलाः भारतं राम भारतया खः धकाः नेपाःप्रति भारतं सांस्कृतिक अतिक्रमण, शोषण याःगु दु। प्रम ओलीं भानु जयन्तीया छगू ज्याझ्वलय् नवासें आक्रोश, असन्तोष प्वंकी । थ्व धापुतिं क्यनी प्रधानमन्त्री ओलीजु सैद्धान्तिक रुपय् सांस्कृतिक अतिक्रमणया घोर विरोधी । थज्याःगु अतिक्रमण न्ह्याक्व हे शक्तिशाली देय्, मनू, जातिं याःसां उकियात मिखा तिस्सिनाः सह याये फइमखु। याये मजिउ । प्रम ओलीजुयाके प्रबल विश्वास खनेदइ ।

प्रमजुया राम, अयोध्याया दावायात कयाः थीथी विचाःत खनेदइ । प्रतिक्रिया लुइ । वय्कःया थःगु हे दलया सहयात्रीतसें ओलीजुया थ्व दावायात कयाः बैमौसमया बाजा धाइ । लघुताभासया चिं । थःगु अदक्षता, कमजोरीपाखें जनताया ध्यान मेखेर छ्वयेगु चाल खः । प्रमजुया कुं खिनीपिं
खनेदइ । तर म्हिगःतक प्रम ओलीयात मांदिक्क ब्वःबिया च्वंपिं कट्टर विरोधीतसें नं ओलीजुया थ्व दावालिपा ओलीजुयात प्रशंसाया स्वां वा गायेका हइ । गुगु ठीक ? गुगु बेठीक ? थन क्वःछीत्यनागु मखु। तर प्रम ओलीजुया थ्व दावां छखेर विदेशी सांस्कृतिक अतिक्रमणया विरोधं मनग्य सन्तोष काये खंसा मेखेर थुकिं देशं आः आन्तरिक सांस्कृतिक अतिक्रमणपाखें पीडित जुइ माली मखु धइगु विश्वास नं क्वातुका बी ।

आः । धाये राम नेपाःमि खः । थुकी सकसिनं राष्ट्रिय गौरव अनुभव याइ । तर नेपाः थेंज्याःगु बहुसांस्कृतिक, बहुभाषिक, बहुधार्मिक देशय् मनूतय् जिज्ञासा थुलिं जक अन्त्य जुइमखु। मनूतय्के उत्सुकता दनावइ, राम पहाडी खः ला कि ? जनजाति खः ? वा मधेशी खः । वया वंश भूमि मधेश खःला कि ? पहाड खः ? वा उपत्यका खः ? रामया थःगु संस्कृति, मातृभाषा साहित्य छु गुगु खः । रामया थःगु वंशानुगत थाय् नेपाः दुने गुथाय् लाः ? बहुजाति, संस्कृति दुगु देशय् थज्याःगु न्ह्यसःत लुया वइ, स्वाभाविक । उचित हे जू । तर थज्याःगु सांस्कृतिक जिज्ञासायात छथ्वः
संकीर्ण राष्ट्रवादीतय्सं विखण्डनकारी, देशद्रोही खंकीपिं नं दु। तर थज्याःगु आरोपीत स्वयम विखण्डनकारी, देशद्रोही खः । जुइ । देय्या खण्डता,
देय्यात आन्तरिक सांस्कृतिक, धार्मिक, भाषिक अतिक्रमणं गुलि मुक्त याये फइ, उलि हे मजबुत जुइ । क्वातुइ । एकल सांस्कृतिक बर्चस्वं देय् मनोवैज्ञानिक रुपं विखण्डीत जुइ । सांस्कृतिक अतिक्रमणं हइगु पीडा, घाः गुलि स्याइ थूम्ह प्रधानमन्त्रीजुया पहलं देय् दुने नं आन्तरिक सांस्कृतिक असन्तुलन अन्त्य जुइ, विश्वास थना बिउगु दु ।

राम नेपाःमि खयाः नं जनजाति खया बिउसा, जनजातितय् भाषा, संस्कृति, धर्मप्रति राष्ट्रियस्तरया सहिष्णुता दयेमाः । राम छुं जुयाः मधेशी, तराई क्षेत्रया जूसा मधेशीत विहारी खः धकाः आरोप याये मजिल । थथे आरोप बीगु याना हलकि राम नं विहारी हे जुइ । अले राम नेपाःमि धकाः दावा याःगुया छु मतलब जुइ । प्रधानमन्त्रीजुया दावा स्वयम विरोधाभासपूर्ण खने दइ । राम नेपाःमि खः धकाः धुक्क जुइबलय् विदेशी अतिक्रमणं
मुक्त जुयागु सन्तोष ला काये फइ । तर देय् दुने आन्तरिक सांस्कृतिक, जातीय सन्तुलन, सहिष्णुता थने मफुत कि, ब्वलंके मफुत कि राम नेपाःमि खयां नं आन्तरिक कलहया कारण जुइ । रामराज्य छखे लाइ ।

वय्कःया थःगु हे दलया सहयात्रीतसें ओलीजुया थ्व दावायात कयाः बैमौसमया बाजा धाइ । लघुताभासया चिं । थःगु अदक्षता, कमजोरीपाखें जनताया ध्यान मेखेर छ्वयेगु चाल खः ।

भानुभक्तया बुदिंया अवसरय् लाकाः प्रम ओलीजुं विदेशी सांस्कृतिक अतिक्रमणया गुगु विरोध याना क्यन । व विरोध देय् दुने नं थौं उतिकं अर्थपूर्ण व सान्दर्भिक खनेदइ । थौं देय् दुने राष्ट्रियता, आधुनिक विकासया नामय् विविध सांस्कृतिक क्षेत्र, सम्पदा, कला, भाषा, साहित्यप्रति गुगु निर्मम आक्रमण, विध्वंसकारी प्रवृत्ति ब्वलनाच्वन, व स्वयम आन्तरिक सांस्कृतिक अतिक्रमण, दमन शोषणया नग्न दसु खः । थज्याःगु घाटक प्रवृत्तिं देय्यात क्वातुकी मखु। खण्डीत याइ । सांस्कृतिक राष्ट्रियता धइगु सही अर्थय् छु। उकिया थ्व खँय् राष्ट्रिय बहस जुइमाः । सर्वस्वीकृत सांस्कृतिक सहिष्णुताया मापदण्ड दयेमाः । देय् दुने च्वंपिं सकसियां मंकाः खः । सकसिनं अपनत्वया अनुभूति याये दयेमाः ।

फुस्लुगु राष्ट्रियताया खँ ल्हानां मजिउ । देय् दुने थाय्थासय् अमूल्य सांस्कृतिक सम्पदा, कलाप्रति अतिक्रमण, आक्रमण जुयाच्वंगु दु। सांस्कृतिकस्थलयात ध्वस्त यायेत स्वयाच्वंगु दु। विदेशी सांस्कृतिक अतिक्रमणया विरोधय् कुहां वःम्ह प्रमजुं देय् दुने जुयाच्वंगु आन्तरिक सांस्कृतिक अतिक्रमण, दमन, शोषण न्हंकेत नं कठोर पलाः छीमाः । प्रम ओलीजुया सैद्धान्तिक इमान्दारिता छु गुलि ? अले सी दइ ।