एमाले–माओवादी एकताया अर्थ

जुइ ला मजुइ ला जुइ ला मजुइ ला जुजुं आखिरय् एमाले माओवादी केन्द्र दथुया एकतां वास्तविक रुप काइगु जुल । प्रतिनिधिसभा व प्रदेशसभाया चुनावय् वाम गठबन्धन दयेकाः वनेगु सहमति अन्ततः पार्टी एकता यायेगुली तक थ्यंगु खः । थ्व निगू चुनाव प्रचारया दौरानय् राजनीतिक स्थिरताया निंतिं एमाले व माओवादी केन्द्र चुनाव क्वचायेधुंकाः पार्टी एकता याना वनेगु धकाः जनताया दथुइ वनेवं उकिया लिच्वः नं निगुलिं दलयात जनतां ‘का, मिले जुयाः हुँ’ धइगु अभिमत बिल ।

चुनाव धुंकाः एमाले माओवादी केन्द्र दथुया पार्टी एकताया बारे ‘का जुइगु जुल’ धकाः खँ न्यने मलाःनि खँ स्यन धइगु बुखँ वयेधुंकी । गुलि खँ एमालेया नायः ओली व माओवादी केन्द्रया पुष्पकमल दाहाल दथुइ सहमति जुल धाःगु खँ कन्हय् कार्यान्वयन मजूगु बुखँय् अन्त जूगु यक्व दृष्टान्तत दु । अथे खःसां आम वाम जनमत व साधारण कार्यकर्तात एकताया पक्षय् दुगुलिं गुगुं नं मूल्य एकता यानाः वनेगुया मेगु विकल्प निगू दलयाके मदु । वंगु सोमवाः फागुन ७ गते निगू पार्टी दथुइ पार्टी एकीकरण यायेगु सवालय् न्हय्गू बुँदाया प्रारम्भिक आधारय् निगू दलया शीर्ष नेतातय्सं ल्हाःचिं तयाः सहमति यायेवं आः एकीकरणया सम्बन्धय् अलमल जुइमाःगु खँ मंत ।

थ्व निगू पार्टी दथुइ एकीकरण जुइगु व मजुइगु घटनां देय्यात निगू लँपुइ यंकीगु गुगु सम्भावना दुगु खः आः उकियात ब्रेक तया बिउगु दु । एकता मजूगु खःसा हानं देस अस्थिरताया दलदलय् लानाच्वनीगु खः । एकता मजूगु खःसा एमालेया नायः जुयाः खड्ग ओली प्रधानमन्त्री जुयाः निदँ तक वने फइ कि मफइ धइगु आशंका ल्यनाच्वनीगु खः । एकता मजूसा एमाले नायःया नेतृत्वया सरकार अप्वयां अप्वः निदँ तक जक न्ह्याइगु अवस्था पिदनी अले माओवादी केन्द्रया पुष्पकमल दाहाल कांग्रेस राजपाया समर्थनय् निदँ लिपा प्रधानमन्त्री जुया बी ।

थुकथंया अस्थिरतां संघीय समाजवादीया नायः उपेन्द्र यादवयात एमालें प्रधानमन्त्री दयेकेमालीगु अवस्था तक वये फइगु सम्भावनायात निगू दलया एकतां पूर्णविराम तयाबिउगु दु । सरकार हिउसां छगू हे दलया मेम्ह प्रधानमन्त्री तक थ्व न्यादँया दथुइ वइ तर गबलें गुगु दलया गबलें गुगु दलया गुला गुलाय् प्रधानमन्त्री वइगु राजनीतिक अस्थिरतायात एकीकरणया कारणं पना बिउगु दु । राजनीतिक स्थिरता जक दयेवं नं देय्या समृद्धिया नितिं यक्व वातावरण तयार जुइ ।

एमाले व माओवादी केन्द्र दथुइ पार्टी एकीकरण यायेगु सम्बन्धय् जूगु न्हय्गू बुँदाया सहमतिं पार्टीया सिद्धान्तयात गुकथं हल यायेगु धइगु मार्गनिर्देशन नं बिउगु दु । कम्युनिष्ट पार्टीइ छकः सिद्धान्तया रुपय् महाधिवेशनं पारित यात कि उगु सिद्धान्त हिलेत कि त पार्टी हे कुचा थले माली मखु धइगु खःसा छकः पारित जूगु सिद्धान्तयात परिमार्जित यायेत तकं तयार मजुइगु संस्कारय् नेपाःया कम्युनिष्ट पार्टीत दुगु खः । थ्वहे कारणं नेपालय् कम्युनिष्ट पार्टीत विभाजित जुइगु याः । तर थ्व विभाजनय् नं स्वयेबलय् शीर्ष नेतातय्गु थःगु स्वार्थया कारणं नं पार्टीत कुचा थला वंगु कम्युनिष्ट इतिहास खः ।

तर लिपांगु इलय् वयाः नेपाःया राजनीतिक दलतय् दथुइ स्वल धाःसा नेतातय् स्वार्थ मिले जुल धाःसा सिद्धान्त व कार्यनीति गौण नं जुइगु याः । गबले गबलें थ्व सकारात्मक घटना नं जुइफु धइगु एमाले व माओवादी केन्द्रया दथुइ एकीकरण सम्बन्धया न्हय्गू बुँदाया सहमति खः धकाः धायेछिं ।
एमालेया बहुदलीय जनवाद व माओवादीया माओवादंनिसें एक्काइसौं शताब्दीया जनवादया खँ थ्व निगू दल दथुइ पार्टी एकीकरणय् पंगः जुइ धइगु आशंका यक्वसिया खः ।

एमाले दुने जबज हे सम्पूर्ण खः थुकी सँ छपु नं उखेथुखे यायेगु मान्य जुइ मखु धइगु मान्यता दुपिं नेतात नं दुसा मेखे माओवादी केन्द्र दुने एमाले कम्युनिष्ट पार्टी धकाः हे स्वीकार मयाइपिंनिसें एक्काइसौं शताब्दीया जनवाद हे मूल खः धकाः कट्टरपन क्यनीपिं नं यक्व दुगु पार्टी माओवादी केन्द्र खः । मदन भण्डारीं पञ्चायतया अन्तः जुयाः बहुदलीय प्रतिस्पर्धाय् वनेत अःपुक एमालेया बहुदलीय जनवादया कार्यनीति हःगु खः उबलेया परिस्थिति बहुदलीय जनवाद कम्युनिष्ट विचारधारां स्वयेबलय् उदारवाद व जनताया दथुइ अःपुक वने जीगु लँपुया रुपय् कार्यान्वयन जुल ।

मखु धइगु खःसा कम्युनिष्ट पार्टीया सिद्धान्तया कारणं पार्टीं ज्वनीगु सैद्धान्तिक पक्ष जब्बर जुयाः समयसापेक्ष हिला वने मफइगु कट्टरवादय् थानाः कम्युनिष्ट पार्टी न्यनावनीगु स्वयां लिकुना वनीगु चरित्र दयाच्वनी । मेखे माओवादी केन्द्रया सैद्धान्तिक पक्ष नं सशस्त्र युद्धंनिसें माओवादयात मार्गनिर्देशक सिद्धान्तया रुपय् नाला कायेमाःगु नीतिइ वःगु हिउपाः अन्ततः बहुदलीय प्रतिस्पर्धायात स्वीकार यानाः माओवादयात मार्गनिर्देशक सिद्धान्तया चीकाः उदारवादी समाजवादी उन्मुख कार्यनीति ज्वनेगुली तक थ्यन ।

खय्त ला नेपाःया फुक्क धइथें दलतय्सं समाजवादया खँ ल्हाःसा थःपिं सरकारय् वा सत्ता दइबलय् समाजवादी उन्मुख नीति स्वयां पूँजीवादया अभ्यास खने दइगु क्रियाकलापय् हे अभ्यस्त जुयाच्वंगु दु । थ्व निगू दल दथुइ जूगु न्हय्गू बुँदाया सहमति सिद्धान्तयात थाति तयाः निगू दलया सिद्धान्तयात नं संयोजन यानाः महाधिवेशनं क्वःछीगु खँ अले पार्टीया नां व सहमति मदुगु तर फुकसिनं सिउगु कथं पार्टीया नायः निम्ह हे जुइगु व प्रधानमन्त्री पाःपाः यानाः चले यायेगु धइगु सहमति जूगु खनेदु । मुख्य रुपं पार्टी एकीकरणया सैद्धान्तिक पक्ष ज्यंगु खःसा कार्ययोजनागत रुपया समस्यात यक्व दनि ।

दकलय् न्हापां एकीकृत पार्टीया स्थायी कमिटी, पदाधिकारी व केन्द्रीय कमिटी गठनय् दकलय् अप्वः समाधान यायेत थाकुइगु खनेदु । एमालेया चीधंगु तर चुस्त कमिटी माओवादीया भराय्धंगु तर संचालन मजुइगु कमिटीयात एकीकृत यानाः कमिटीत दयेका वने मानि । थुकथं हे प्रदेश जुयाः जिल्ला व स्थानीय तहया कमिटीत एकीकृत यायेगु सवालय् नं यक्व ई काइगु खनेदु । उकिं पार्टी एकीकरणया थ्व प्रक्रिया सायद नेपाःया इतिहासय् निगू दल दथुइ पार्टी एकीकरणं पूर्णता कायेत दकलय् अप्वः ई काइगु एकीकरणया घटनाया रुपय् जुइ । तर न्ह्याथे हे जूसां थ्व निगू दलया एकीकरणं राजनीतिक स्थायित्वया शंका निवारण छखे दुसा चिचीधंगु एकीकृत विशाल कम्युनिष्ट पार्टीया चाहना याइपिनिगु निंतिं नं लसताया घटना जुल ।