नेवाः स्यनामि दबूया झिंखुदँ बुन्हि

येँ (नेपालभाषा टाइम्स)- नेवाः स्यनामि दबूया झिंखुक्वःगु बुदिं व येँ महानगरपालिका दुनेया सामुदायिक विद्यालयय् नेपालभाषा स्यनीपिं नेवाः स्यनामिपिंत सम्पदा भ्रमणया ज्याझ्वः ख्वपया चोंङा
गणेशय् जुल । ज्याझ्वःया मूपाहां बागमती प्रदेशया संस्कृति मन्त्री शैलेन्द्र बज्राचार्यं बागमती प्रदेशय् नेपाल भाषा कामकाजीया भाय् जुइधुंकूगु इलय् थुकियात सम्बर्धन व विकास यायेगु दायित्व झीगु हे ब्वहलय् वःगु खँ न्ह्यथनादिल ।

अथेहे भाषा आयोगया दुजः सुरेश मानन्धरं विद्यालयय् नेपालभाषा स्यनेगु ज्या झीगु प्रतिस्था नापं स्वापू दुगु जूगुलिं मस्तय्त बांलाक स्यनेमाःगु खँ कनादिल । येँ मनपाया पुलांम्ह मेयर विद्यासुन्दर शाक्यं नेवाः स्यनामि दबूया योगदान न्ह्यथनादिसें थुकी ग्वाहालि यानादीपिं सकसितं सुभाय् देछानादिल । येँ मनपा सहरी योजना आयोगया पुलांम्ह दुजः गुजेश्वरी श्रेष्ठं सकल स्यनामिपिंसं भिंतु मतिइ तयाः ब्वंकेत इनाप यानादिल । नेवाः स्यनामि दबूया कोषाध्यक्ष काय बहादुर व्यन्जनकारया सभापतित्वय् जूगु उगु ज्याझ्वलय् दबूया छ्यांज्ये बरुणप्रसाद वैद्यं लसकुस यानादीगु खः ।

नेपालभाषाया सम्बर्धन व विकासया लागिं थुगु भाषायात प्राथमिक तगिंनिसें उच्च शिक्षा तक अध्ययन याकेत व थीथी ब्वनेकुथि नेपालभाषा स्यनेगु ताः तयाः नेवाः स्यनामि दबू नीस्वनाः ज्या याना वयाच्वंगु दु । वि.सं.२०६५ सालय् पलिस्था जुयाः २०७३ सालय् जिल्ला प्रशासन कार्यालयय् विधिवत दर्ता यानाः थीथी ज्याझ्वः न्ह्याका वयाच्वंगु दु । थ्व संस्थां येँ मनपाया ग्वाहालि कयाः १४ गू सामुदायिक विद्यालयय् न्हय्म्ह स्यनामि नियुक्त यानाः छगू निसें न्यागू तगिंया विद्यार्थीयात नेपालभाषा ब्वंकेगु शुरू याःगु खः।

वि.सं. २०७७ असोज १९ गतेया येँ मनपाया निर्णय कथं नपा दुनेया दक्व विद्यालय नेपालभाषा ब्वंकेगु निर्णयकथं पाठ्यक्रम तयार यायेगु व थीथी तालिम बीगु ज्याय् नेवाः स्यनामि दबुलिंं ग्वाहालि याना वयाच्वंगु दु । थुगु संस्थां आः तक सामुदायिक विद्यालयया १७२ म्ह स्यनामि लिसें ३१५ गू संस्थागत विद्यालयया ३४२ म्ह स्यनामियात नेपालभाषा स्यनेगु तालिम बीधुंकूगु दु ।

सम्बन्धित बुखँ

LEAVE YOUR COMMENTS