स्वनिगः लगायत प्रमुख सहरय् वायु गुणस्तर मापन केन्द्र तइगु
येँ – स्वनिगः लगायत देय्न्यंकंया प्रमुख सहरय् अप्वया वनाच्वंगु वायु प्रदूषण स्तर मापन यायेत वायु गुणस्तर मपन केन्द्र स्थापना याइगु जूगु दु । मुख्य सहरय् वायु गुणस्तर मापन केन्द्र विस्तार यायेत नापं वातावरण परीक्षण व अनुगमनयात प्रभावकारी दयेकेगु ल्याखं बजेटया व्यवस्था याःगु दु ।
अर्थमन्त्री डा. युवराज खतिवडां आर्थिक दँ ०७५÷७६ या निंतिं आः नकतिनि सार्वजनिक यानादीगु आयव्यय विवरणय् उगु खँ दुथ्याकातःगु खः । अर्थमन्त्री खतिवडां बजेट सार्वजनिक यासें स्वनिगःया वातावरणीय स्वच्छता कायम यायेत नापं ध्वनि, धू व कुँया प्रदूषण नियन्त्रण व फोहर व्यवस्थापनय् ग्वाहालि यायेगु जुइ धयादीगु दु ।
स्वनिगःया स्वच्छताया निंतिं प्रदूषणमुक्त नेपाल अभियान न्ह्याकाः स्वनिगःयात हराभरा यायेत जैविक विविधता व जलवायु परिवर्तन अनुकूलनया निंतिं सरकारी, निजी, सहकारी, सामुदायिक व गैरसरकारी निकाय दथुइ सहकार्य याना वनेगु वय्कलं धयादिल ।
स्वच्छ लःया स्रोतया रुपय् दुगु हिमाल व हिमतालया संरक्षणया निंतिं नं बजेट विनियोजन यानागु धासें विश्वया सर्वोच्च शिखर सगरमाथा लगायत मेमेगु उच्च हिमशिखर नापं उकिया जःखःया लागाय् सुचुपिचु यायेगु निंतिं विशेया ध्यान बीगु वय्कलं धयादीगु दु ।
LEAVE YOUR COMMENTS