गण्डकी नां विरुद्ध थौं प्रदेश नं. ४ बन्द
येँ – प्रदेश नं. ४ या नां गण्डकी प्रदेश तःगु विरुद्ध तमुवान मगरात संघर्ष समिति व नेपाल आदिवासी जनजाति महासंघं थौं प्रदेश नं. ४ बन्द याःगु दु । बन्दया झ्वलय् पोखराय् सार्वजनिक यातायात व शैक्षिक संस्थात पूवंक बन्द जूगु दुसा छुं छुं सरकारी ज्याकू जक चालाच्वंगु दु । मेमेथाय् नं आंशिक प्रभाव लाःगु दु । बन्द आह्वान यासें संघर्ष समिति व जनजाति महासंघया कार्यकर्तात पोखरा चोक चोकय् वयाः प्रदर्शन यानाच्वंगु दु ।
प्रदेश नं. ४ या नां गण्डकी तःगु विरुद्ध तमुवान–मगरात संघर्ष समितिं विरोध प्रर्दशन याना वयाच्वंगु । समितिं प्रदेशया नां गण्डकी तःगु खँय् असहमति क्यँसें म्हिगः तनहुँया दमौलीइ प्रदर्शन याःगु खः । प्रदर्शनया झ्वलय् गण्डकी नां खारेज याये माः धयागु नारा थ्वयेकुसें सिठ्ठी जुलुस पिकाःगु खः ।
जुलुस लिपा कोण सभाय् न्ववाये गु झ्वलय् संघर्ष समितिया अध्यक्ष सिद्धान्त थापां तमुवान मगरात नामाकरण मयातधाःसा कडा आन्दोलन यायेगु ख्याच्वः नं बियादीगु दु ।
थ्वहे झ्वलय् नयाँशक्ति नेपालया राष्ट्रिय मामिला संयन्त्रया संयोजक हिसिला यमिं शनिवाः छगू प्रेस वक्तव्य जारी यासें गण्डक प्रदेशया नामाकरणया विरोध यानादीगु दु ।
प्रेस वक्तव्यय् संविधानसभां जारी याःगु ने पाःया संविधानया प्रस्तावनाय् हे बहुजाति, बहुभाषिक, बहुधार्मिक, बहुसांस्कृतिक व भौगोलिक विशेषतां जाःगु देय् धयातःगु फुकस्यां सिउगु खँ धासें थुकियात पुष्टि यायेगु निंतिं राज्य पुर्नसंरचना समिति व आयोग निगुलिं समितिं तकं नेपाःया संघीयताया आधार न्यागू पहिचान व प्यंगू आधार यात छखे तयाः संविधानया मूल मर्म अःखः गण्डक प्रदेश नामाकरण याःगुलिं थुकिया विरोध याना धकाः न्ह्यथनातःगु दु ।
LEAVE YOUR COMMENTS