आशा सफूकुथिइ हस्तलिखित ग्रन्थ संरक्षण तालिम

येँ – नेपाःया अमूल्य हस्तलिखित ग्रन्थतय्त सुरक्षित तातुनाः थनया आशा सफूकुथिइ देय्या ततःधंगु सफूकुथि व अभिलेखालयतय्त तालिम बीगु ज्या शुरु जूगु दु । जर्मनीया ह्याम्वर्ग युनिभर्सिटीया ‘द सेन्टर फर द स्टडी अफ म्यानुस्क्रिप्ट कल्चर (सीएसएमसी)’ पाखें थ्व तालिम बिउगु खः । थुकी आशा सपूmकुथि लगायत राष्ट्रिय अभिलेखालय, केशर पुस्तकालय, त्रिविविया केन्द्रीय पुस्तकालय आदि थासं वःपिं प्रतिनिधितय्सं नं तालिम कयाच्वंगु दु ।

शुक्रवाः च्वसापासाय् छगू ज्याझ्वःया दथुइ थ्व तालिमया उलेज्या जुल । ज्याझ्वलय् न्ववासें सीएसएमसीया निर्देशक माइकल फ्रेडरिकं थौंकन्हय् युद्धग्रस्त देशय् तकं अनया ऐतिहासिक हस्तलिखित ग्रन्थत संरक्षण यायेगु ज्याय् थःपिं लगे जुयाच्वनागु खँ कँसें थ्व संरक्षणया तालिम लिपा नेपाःया हस्तलिखित ग्रन्थत नं कन्हय् वनाः विश्व ज्ञानया छगू अंग जू वनीगु बिचाः तयादिल ।

पुलांम्ह संस्कृति मन्त्री लिसें आशा सफूकुथि बोर्डया दुजः ऋद्धिबाबा प्रधानं नेपाःया म्हसीका धइगु हे थनया संस्कृति खः धासें उकिया हे छगू अंग हस्तलिखित ग्रन्थ जूगु कारणं उकिया संरक्षण अतिकं आवश्यक जू धयादिल ।
राष्ट्रिय अभिलेखालयया निर्देशक शौभाग्य प्रधानांगं नेपालय् न्हापांनिसें हे हस्तलिखित ग्रन्थत संरक्षण यायेगु परम्परा दुगु खँ कँसें आःया संरक्षणं झीत आधुनिक विधि समेत स्यनीगु बिचाः तयादिल ।

ज्याझ्वलय् आशा सफूकुथिया बोर्ड दुजः निर्मलमान तुलाधर, त्रिविवि केन्द्रीय पुस्तकालयया इन्द्रप्रसाद अधिकारी, डिल्लीरमन कल्याणी रेग्मी मेमोरियल लाइब्रेरी डेभलपमेन्ट बोर्डया प्रमुख इन्दिरा दल, राष्ट्रिय संग्रहालयया प्रमुख जयराम श्रेष्ठपिंसं नं न्ववानादीगु खः ।

सीएसएमसी ह्याम्वर्गया डा. विदुर भट्टराईया संयोजनय् जुयाच्वंगु थ्व तालिमय् जर्मनीं झाःम्ह माइकल बिडलं मू प्रशिक्षण बियादी । तालिम झिन्हु तक न्ह्याइगु ज्याझ्वः दु ।