येँमपां जैशीदेगल युथ क्लबयात खेलकुद सामाग्री लःल्हात

येँ (नेपालभाषा टाइम्स) – ‘खेलकुद सामग्री बियागु धइगु व्यक्तिगत मखु संस्थागत खः, जिं जिगु खल्तिं बियागु मखु, थ्व छगू राज्यं बिउगु खः उकिं थ्व छगू येँ महानगरपालिकां बिउगु खः । यायेमाःगु थीथी ज्यामध्ये थ्व छगू चिधंगु ज्या जक खः । खय्त ला थुज्वःगु आपाः हे ज्या थीथी वडाय् थीथी त्वालय् याये धुन । अय् नं थीथी संघसंस्था सकसितं माःगु ग्वाहालि याये फयाच्वंगु मदु’ थ्व खँ म्हीग शनिवाः थनया जैसीदेगल युथ क्लबया ग्वसालय् येँ महानगरपालिकां खेलकुद सामाग्री लःल्हायेगु ज्याझ्वलय् मूपाहांया थासं येँ महानगरपालिकाया मेयर बिद्यासुन्दर शाक्यं धयादीगु खः ।

क्लबया अध्यक्ष नापं अन्तर्राष्ट्रिय अम्पायर राजेश प्रजापतिया सभापतित्वय् न्ह्याःगु ज्याझ्वलय् येँ महानगरपालिका २१ वडाअध्यक्ष उदयचुडामणि वज्राचार्य पाहांकथं झायादीगु खःसा क्लबयात येँ महानगरपालिकां करीव प्यंगू लाख तका
बराबरया खेल सामग्री ग्वाहालि याःगु खः । थ्व स्वयां न्ह्यः क्लबया छेँ दनेगुलिइ नं ग्वाहालि याःगु खः ।