ने. सं. ११४४ कछलागा तृतीया -

विश्वकप ट्रफि लिसें प्यंगू अर्ब झिगू करोड दां

एजेन्सी- एक्काइसौं संस्करणया विश्वकप फुटबल प्यदँ लिपा कतार नापलायेगु प्रतिबद्धता प्वंकुसें क्वचाःगु दु । आइतवाः चान्हय् जूगु फाइनल कासाय् क्रोसियायात २–४ गोलं पराजित यासें फ्रान्सं विश्वकप त्याकूगु लिसें रसियाय् जुयाच्वंगु विश्वकप क्वचाःगु खः ।
फ्रान्स थुगुसी निक्वःखुसी विश्वकप त्याकूगु खः । थ्वयां न्ह्यः सन् १९९८ य् थःगु हे घरेलु मैदानय् विश्वकप त्याकूगु खः ।
विश्वकप विजेता फ्रेञ्च टिमयात लसकुस यायेगु निंतिं परिसय् लखौं फ्रान्सेली जनता सतकय् कुहां वयाच्वंगु दु । फ्रेञ्च राष्ट्रपति इमानुएल माक्रों पेरिसया च्याम्प इलेसिस एभेन्युलय् विश्वकप लिसें फ्रेञ्च टिमयात लसकुस याइ । थन लखौं फ्रेञ्चत थः कासामितय्त लसकुस यायेत मुनेधुंकूगु दु ।विश्वविजेता टिमयात थन लसकुस यायेधुंकाः बसय् तयाः देय् चाःहकी ।
थुगुसी विश्वकप त्याकेवं फ्रान्स लुँया ट्रफि लिसें प्यंगू अर्ब झिगू करोड दां नं त्याकूगु दु । विश्वकप ग्वसाः खलः फिफां उप विजेता क्रोसियायात स्वंगू अर्ब निगू करोड, स्वंगूगु थासय् लाःगु बेल्जियमयात निगू अर्ब ९८ करोड व प्यंगूगु थासय् लाःगु इंग्ल्यान्डयात निगू अर्ब ३७ करोड तका दां सिरपाः बिउगु खः ।
अथेहे क्वार्टरफाइनलय् थ्यंगू उरुग्वे, ब्राजिल, रुस व स्वीडेन हरेक टिमयात छगू अर्ब ७२ करोड, प्रिक्वार्टरफाइनलय् थ्यंगु पोर्चुगल, अर्जेन्टिना, मेक्सिको, जापान, स्पेन, डेनमार्क, स्वीटजरल्यान्ड व कोलम्बिया हरेक टिमयात छगू अर्ब २९ करोड व समूह चरणं पिने लाःगु झिंखुगू टिमयात ८६ करोड ३२ लाख तका लःल्हाःगु खः । थुपिं फुक्कं यानाः थुगुसीया विश्वकपय् ४३ अर्ब तकाया सिरपाः बिउगु खः ।
थुगुसीया विश्वकप रुसया झिंछगू शहरया झिंनिगू रंगशालाय् जूगु खः । मुक्कं लछि तक जूगु ६४ गू कासाय् ३२ गू टिमपाखें ७३६ म्ह कासामिं ब्वति काःगु खः । थुगुसीया विश्वकपय् ११० म्ह कासामितय्सं मुक्कं १६९ गू गोल यातसा सहभागी फुक्क हे टिमं गोल यायेत ताःलाःगु खः । थुकी मध्ये १२ गोल आत्मघाती जूगु खःसा २२ गू गोल पेनाल्टिपाखें जूगु खः । थुगु विश्वकपय् ह्याउँगु कार्ड प्यम्हेसित क्यनसा २१९ म्हेसित म्हासुगु कार्ड क्यंगु खः ।
थुगुसी दकलय् अप्वः गोल याःम्ह इंग्ल्यान्डया ह्यारि क्यान जुलसा दकलय् अप्वः गोल याःगु टिम बेल्जियम जुल । अथेहे पोस्टय् ३५२ क्वः आक्रमण याःगु क्रोसिया दकलय् अप्वः पोस्ट आक्रमण याःगु टिम जुल । इंग्ल्यान्डं दकलय् अप्वः ३ हजार ३३६ पास म्हितलसा दकलय् बांलाःगु रक्षापंक्त दुगु टिम क्रोसिया जुल ।
क्रोसियाया कप्तान लुका मोड्रिक विश्वकप २०१८ या उत्कृष्ट कासामि जुयाः गोल्डेन बल त्याकेत ताःलात । अथेहे फ्रान्सया केलियन एम्बाप्पे उत्कृष्ट युवा कासामि जुल । झिंगुदँया एम्बोप्पे थ्व विश्वकपय् प्यंगू गोल याःगु खः । प्रतियोगिता जःछि खुगू गोल याःम्ह ह्यारि केनं गोल्डेन बुट त्याकल । अथेहे उत्कृष्ट बचाउ याःम्ह बेल्जियमया गोलकिपर कोर्टिएसयात गोल्डेन ग्लोब लःल्हाःगु खः । फिफा फेयर प्लेया सिरपाः स्पेनयात लःल्हाःगु खः ।
विश्वकपया नीनिक्वःगु संस्कारण आः एसियाया कतारय् सन् २०२२ या नोवेम्भर २१ निसें डिसेम्बर १८ तक जुइ ।