ने. सं. ११४३ तछलाथ्व दशमी -

लँ बन्द जुयाः फोहोर द्वँचिंगु झिन्हु दत !

येँ- येँया पासाङल्हामु राजमार्गय् स्थानीय वासिन्दां लँ बन्द याना बिउगुलिं येँ महानगरपालिका लगायत स्वनिगःया १८ गू नगरपालिकाय् फोहोर द्वँचिनाच्वंगु थनिं झिन्हु दत । थुकिं यानाः नगरय् दुर्गन्ध ब्वलनीगु समेत शुरु जूगु खँ स्थानीय मनूतय्सं धयाहःगु दु ।

पासाङ ल्हामु राजमार्गय् लँ पीच यायेगु लागिं स्थानीय जनतां सरकारयात इनाप याना वयाच्वंगु तःदँ हे दयेधुंकूगु दु । तर सरकारं गबलें नं वास्ता मयाःगु कारणं आक्रोशित जूपिं स्थानीय जनतां थुगुसी लँ हे पना बिउगु खः । अन लँ दयेकेगु लागिं सरकारलिसे स्वक्वः तक सम्झौता जूगु खःसां सरकारं धाःसा लँ दयेकेत वास्ता मयाःगु खँ धाःगु दु ।

लँ बन्द जुयाः फोहोर मुना यंकेगु ज्या मजुइवं उकिया दोष धाःसा येँ महानगरपालिकायात वयेगु यानाच्वंगु खँ मनपा वातावरण विभागया प्रमुख सरिता राईं कनादीगु दु । संघीय सरकारं अन दयेका बीमाःगु लँ आः तक मदयेकूगु कारणं स्थानीय जनतां तःक्वः हे लँ बन्द यानाः विरोध प्रकट यायेधुंकूगु दु ।

वय्कःया कथं थौंकन्हय् फोहोर वायेगु यानाच्वंगु सिसडोलया डम्पिङ साइट जायेधुंकूगु कारणं वयां भचा च्वय् च्वंगु बञ्चरे डाँडाय् फोहोर वायेगु थाय् दयेकूगु खःसां अन नं सरकारं पूवंक ज्या याःगु मदु । थ्वहे झ्वलय् येँ मनपाया मेयर विद्यासुन्दर शाक्यं प्रधानमन्त्री शेरबहादुर देउवायात नापलानाः लँ दयेकेत पहल शुरु यानादीगु खँ सीदुगु दु ।