यल महानगरं नेवाः भासं आखः ब्वंकीगु

यल- यल महानगरपालिकां नेपालभाषाया स्कुल चायेकेगु तयारी यानाच्वंगु दु । मस्तय्त मां भासं आखः ब्वंकेगु नितिं नेपालभाषां ब्वंकीगु स्कुल चायेकेगु बारे सहलह जुयाच्वंगु जानकारी यल मनपाया शिक्षा अधिकारी महेन्द्रबहादुर क्षेत्रीं बियादीगु खः । यल मनपां छुं दँ न्ह्यवंनिसें प्रारम्भिक बाल विकास (इसीडी) इ नेपालभाषां ब्वंकेगु ज्या न्ह्याकूगु खः । थौंकन्हय् झिगू इसिडी सञ्चालन जुयाच्वंगु दु ।

वय्कलं स्कुलया क्वय्या तहनिसें च्वय्या तह तक नेपालभाषा ब्वंकेगु आज्जु दुगु खँ कनादिल । वय्कलं धयादी, ‘आधारभूत तहलय् अभिभावकं चाहे जुल धाःसा थःगु भासं ब्वंकेदइ ।’

सामुहिक विद्यालयं अभिावकयात आकर्षित यायेत अग्रेजी भासं ब्वंकेगु यानाच्वंगु इलय् यल मनपां धाःसा नेपालभाषां ब्वंकेगु तयारी यानाच्वंगु खः । अभिभावकपिंसं थः मस्तय्त मांभासं ब्वंके चाहे जूगुलिं थःपिंसं मांभासं आखः ब्वंकेगु तयारी यानाच्वनागु जानकारी नं शिक्षा अधिकारी क्षेत्रीं बियादिल ।

यल मनपाय् सामुदायिक व संस्थागत यानाः २०२ स्कुल दुसा प्रारम्भिक बाल विकास ७४ स्कुल चायेकातःगु दु ।