आइतवाः ग्लोबल नेवाः कन्फरेन्स
येँ (नेपालभाषा टाइम्स)- स्वक्वःगु ग्लोबल नेवाः कन्फरेन्स आइतवाः किपूया ससः त्वाःया हलय् जुइगु जूगु दु । वइगु मंगलवाः निसें सुरु जुइत्यंगु विश्व एनआरएन सम्मेलनया झ्वलय् ग्लोबल नेवाः कन्फरेन्स जुइत्यंगु खः ।
नेपालं पिने च्वनाच्वंपिं नेवाःतय्त एक्यबद्धता यानाः नेवाः एनआरएन मार्फत नेवाः, भाय्, कला, संस्कृति, संकिपा, लिपि विकासया लिसें आर्थिक उन्नतिया ज्याय् विदेशय् च्वनाच्वंपिं नेवाःत दथुइ ग्वाहालि कालबिल यायेगु, नेपाःया कला संस्कृति संसारन्यंक न्यंकेगु, एनआरएन अभियानय् नेवाःतय् सहभागिता तसकं म्हो जुयाच्वंगुलिं अप्वःसिबें अप्वः नेवाःतय्त सहभागी याकेगु लिसें एनआरएन नेतृत्वय् अप्वः नेवाःत थ्यंकाः नेतृत्व विकास यायेगु ताः तयाः ग्लोबल नेवाः कन्फरेन्स जुइत्यंगु खः ।
विश्व एनआरएनय् मुक्कं ४२२७ म्ह मतदाता दुगुलि उकी मुक्कं निसःम्ह जक नेवाः मतदाता दु । वइगु निदँया दुने नेवाः मतदातातय् ल्याः द्वःछि थ्यंकेगु कुतः जुइगु खँ धाःगु दु ।
ज्याझ्वःया कजि सुनिल कुमार शाक्यं विदेशय् च्वंपिं नेवाःतय्त फयांफछि थुगु ज्याझ्वलय् सहभागी जुइत इनाप यानादीगु दु । ज्याझ्वःया व्यवस्थापनया ज्या नेवाः जागरण मञ्चया कजि सुजिव वज्राचार्य, नेवाः देय् दबू ख्वपया नायः नरेश नेवाः व नेवाः एकता अभियानया दुजः नारायण जोशीं याना वयाच्वनादीगु दु ।
ग्लोबल नेवाः कन्फरेन्सया निंतिं एनआरएनया पुलांम्ह कोषाध्यक्ष प्रीतम श्रेष्ठ, नेवाः देय् दबूया संरक्षक नरेश ताम्राकार, एनआरएन ओरेगन च्याप्टरया पुलांम्ह नायः दयारत्न शाक्य, हिरोशिमा विश्वविद्यालयया प्रा. डा. केशवलाल महर्जन, बेलायतया डा. शान्तवीर सिंह तुलाधर विशेष सल्लाहकार जुयाच्वनादीगु दु ।
न्हापांगु ग्लोबल नेवाः कन्फरेन्स २०१७य् व निक्वःगु कन्फरेन्स २०१९ य् जूगु खः ।
LEAVE YOUR COMMENTS