कन्हय् निसें शंखरापुर नगरपालिका सिल याइगु

येँ – कोरोना भाइरसा (कोभिड-१९)या संक्रमण अप्वयाच्वंगु इलय् येँया शंखरापुर नगरपालिकां कन्हय् निसें नगर क्षेत्रय् सिल याइगु जूगु दु ।

नगरपालिकाया प्रमुख सुवर्ण श्रेष्ठं थौं छगू सूचना पिथनादिसें कन्हय् (जेठ ९ गते) सुथय्या १० बजे निसें नगरपालिका दुहांवयेगु व पिहांवनेगु फुक्कं सिमा व नाका पूर्णरुपं सिल यायेगु खँ धयादीगु दु । नगरपालिका दुने उच्च सतर्कताया निंतिं कन्हय् निसें मेगू सूचं जारी मजुतलेया निंतिं सिल जुइगु खँ नगर प्रमुखं धयादिल ।

संक्रमण नियन्त्रण यायेगु निंतिं थौं वडा नं ४ निसें वडा नं ९ तकया २९०म्ह जनप्रतिनिधि, कर्मचारी व स्थानीय बासिन्दाया आरटीडी मार्फत कोरोनाया परीक्षण जूगु खः । उगु परीक्षणय् १२म्हेसिया रिपोर्ट पोजेटिभ वःगु उमिगु पीसीआर विधिपाखें परीक्षण यायेगु प्रक्रियाय् दुगुलिं नगरपालिकाय् सिल तयेमाःगु खँ धाःगु दु ।

पीसीआर परीक्षण यायेगु निंतिं स्वाब संकलन यायेगु ज्या शुक्रवाः सुथय् जुइत्यंगु खँ नगरपालिकां धाःगु दु । पीसीआर विधिपाखेंया लिच्वः मवतले आरडीटी पोजेटिभ जूपिंत शंखरापुर-७ सिपुख्यःया बाल क्षेत्र क्वारेन्टाइनय् तइगु जूगु दु । क्वारेन्टाइनय् च्वंगु ई तकया आवश्यक सुविधा नगरपालिकां याइगु खँ धाःगु दु ।