मुख्यमन्त्रीयात नेवाः–तामाङया ज्ञापन

येँ – ३ नम्बर प्रदेशया मुख्यमन्त्री डोरमणि पौडेलयात नेवाः–ताम्सालिङ समितिं ज्ञापनपत्र लःल्हाःगु दु । समितिया पदाधिकारीतय्पाखें नेवाः देय् दबूया नायः नरेश ताम्रकारं म्हिगः राजधानी हेटौंडाय् वय्कःयात नापलानाः ज्ञापनपत्र लःल्हाःगु खः । ज्ञापनपत्रय् ३ नम्बर प्रदेशया नां ‘नेपालमण्डल’ तयेमाःगु, थ्व प्रदेशय् नेपालभाषा व तामाङ भाय्यात नं सरकारी भाय् दयेकेमाःगु आदि माग दुथ्यानाच्वंगु दु । ज्ञापनपत्र लःल्हाना कायेधुंकाः मुख्यमन्त्री पौडेलं थुकिया बारे थम्हं गम्भीर रुपं ध्यान बीगु बचं बियादिल । भाषाया सवालय् भाषा आयोगं गज्याःगु रिपोर्ट बी उकियात थम्हं पूवंक पालना यायेगु जुइ धकाः नं वय्कलं बचं बियादिल । ज्ञापनपत्र बीगु लागिं समितिया दुजःपिं विद्युत वज्राचार्य, दिलीप महर्जन, बाबु घिसिङ आदिपिं नं नापं झाःगु खः । नेवाः–ताम्सालिङ समितिं प्रदेशया राजधानी नं हेटौंडाय् मतसे सकसितं पायक जुइ कथं काभे्र जिल्लाय् तयेमाः धकाः माग यायेगु निर्णय याःगु दु ।