गुकथं ७३ म्ह यात्रुया ज्यान बचे यायेत ताःलात

येँ – बुद्ध एयरया छगः विमान सम्भावित दुर्घटना पाखें बचे जूगु दु । सोमवाः सुथय् यँेनं विराटनगरया निंतिं ब्वःगु विमानय् ल्यान्डिङ गेयरया समस्या वःगु खः । विराटनगरय् थ्यने हे त्ययेकाः विमानया जवपाखेया ल्यान्डिङ गेयर लक जुइवं विमान अवतरण यायेत समस्या ब्वलंगु खः ।

गियरय् समस्या खने दयेवं पाइलटं ग्रान्ड अपरेशनया इन्जिनीयरत लिसे सल्हा यायां कुतः याःबलय् हाकनं स्वंगुलिं ल्यान्डिङ गेयर ठीक जूगु खनेदुगु खः । ल्यान्डिङ गेयर ठिक जूसां सुरक्षायात ध्यानय् तयाः विमानयात हाकनं येँय् हे हयाः त्रिभुवन विमानस्थलय् अवतरण याकूगु खः ।

विमानय् समस्या खनेदुगु जानकारी वयेवं ‘फोस्र्ड’ अवतरण याकेगु निंतिं त्रिभुवन विमानस्थलया धावन मार्गय् फोम लायेगु, दमकल, एम्बुलेन्स तयारी अवस्थाय् तयेधुंकूगु खः । तर गियरय् खनेदुगु समस्या ज्यंगुलिं विमान दुर्घटना पाखें बचे जूगु खः ।

येँ लित हयेधुंकाः आकस्मिक अवतरण याकेगु निंतिं विमानय् च्वंगु चिकं फुकेत येँया आकाशय् हे चाःहिकातःगु खः । नेपाल नागरिक उड्डयन प्राधिकरणया कथं त्रिभुवन विमानस्थलय् अवतरण याये न्ह्यः नं म्हो उचाइलय् विमानयात ब्वयेकाः विमानया स्थितियात कयाः समीक्षा यानास्वःगु खः । ल्यान्डिङ गेयरय् खनेदुगु समस्या इन्डिकेटरं ठीक जूगु क्यनेवं विमानयात अवतरण याके बिउगु खः ।

बुद्ध एयरं धाःसा बिहिवाः हे छगू वक्तव्य जारी यासें विमानया गेयरय् मखुसें इन्डिकेटरय् जक समस्या वःगु खँ धाःगु दु । प्राइमरी व सेकेन्डरी इन्डिकेटर मध्ये प्राइमरी इन्डिकेटरय् ह्याउँगु मत च्याःगु व विमान येँया आकाशय् थ्यनेधुंकाः थःपिनिगु प्राविधिक टिमयात ल्यान्डिङ गियर ठीक जूगु व स्वंगुलिं गियर कुहां वःगु जानकारी बिउगु खँ बुद्ध एयरं धाःगु दु ।
सोमवाः सुथय् ८ः३५ बजे येँनं ब्वःगु एटीआर विमानय् चालक दलया दुजःपिं बाहेक ७३ म्ह यात्रु दुगु खः ।

सम्बन्धित बुखँ

LEAVE YOUR COMMENTS