बेलायतय् कोरोना संक्रमित छम्ह नेपाःमिया अनुभव
बिबिसी – बेलायतय् छुं न्हि न्ह्यः कोरोना भाइरसं संक्रमित जुयाः अस्पना भर्ना जूम्ह छम्ह नेपाःमि मिसा आः उपचार लिपा स्वस्थ जुइधुंकूगु दु । वय्कःया अनुभव गथे जुल ? नेपालय् लकडाउन जुयाच्वंगु इलय् वय्कःया सुझाव छु दु ले ? वय्कः गुकथं संक्रमित जुल ले ? बिबिसीलिसे वय्कलं यानादीगु खँल्हाबल्हाया छुं अंश :
जि सुरुइ नियमित ज्याय् हे वना वयाच्वंगु खः, अले नये-नी यायेधुंकाः द्यं वना । तर चान्हय् तसकं ज्वर वल । कन्हय् कुन्हु लिक्कसं लाःगु क्लिनिकय् वना । अन जितः छेँय् हे च्वनेत सल्हा बिल । जि छेँय् हे वयाः च्वंच्वना । जितः सेखं चाइगु छुं नं मदु, खालि छ्यं स्याइगु समस्या जक जुल ।
वासः नयां नं ज्वर कुहां हे मवः । जि वासः नयाः छेँय् हे च्वंच्वना । तर ज्वरधाःसा कुहां हे मवं, अले जि हाकनं क्लिनिकय् वना । अन जिगु खैया नमूना काल । अले जितः कन्हय् कुन्हु फोन वल, अले धाल – छिके कोभिड पोजिटिभ खनेदु, सासः ल्हाये थाकुसा अस्पतालय् हे वा ।
जि अस्पताल वना । विशेष सुसाकुसाः याइगु कक्षय् जितः तल । अन विशेष चिकित्सक व स्वास्थ्यकर्मी जक वनीगु जुयाच्वन । उपिं नं अन १५ मिनेटं अप्वः च्वनीमखु जुयाच्वन । उमिसं विशेष वसः पुनातःगु दइ । बुट, गाउन, मास्क, चस्मा, छ्यं त्वपुइगु तपुली आदि । मेमेपिं विरामी नं दु । उमिसं जिके यक्वः हे चःति वयाच्वंगु खंकल । उपिं जिगु न्ह्यःने नं वइमखु । छम्ह तसकं गम्भीर विरामी नं दु ।
भाइरस बारे मसिइगु जुयाच्वन
थ्व भाइरस गन दइ धयागु हे मसिइगु जुयाच्वन । जिं अस्पतालय् च्वनाबलय् अथे हे अनुभव याना । थन बेलायती सरकारी नं सेल्फ आइसोलेसन अर्थात एकान्तवासय् हे बः बियातःगु दु । जि नं अथे हे धाये । भाइरस पुने धुंकूसां पत्ता लगे यायेत ई काइगु जुयाच्वन । जितः नं थन झिन्हु लिपा बल्ल जाँचय् यात, अले पत्ता लगे जुल । उकिं तसकं सावधानीपूर्वक च्वनेमाः । नेपालय् नं सरकारं छेँय् हे च्वनेत इनाप याःगु दु । उकिया पालना याये । एकान्तवासय् च्वनेगु सयेके । सुचुकुचुइ यक्व ध्यान बी ।
न्यान्हु अस्पतालय् तयेधुंकाः जितः छेँय् छ्वया हल । आः जि आराम कयाच्वनागु दु । ज्वर कम जूगु दु । चिकित्सकतय्सं निताजिया एन्टिबायोटिक वासः बिउगु दु । व हे नयाः च्वनागु दु । जि आः क्वय्या तँय् च्वंच्वनागु दु । जितः ज्वरे यायेगु अलगय् हे थाय् दु । जिगु चःबि नं बिस्कं हे दु । जिमि जहान चाहिँ च्वय्या तँय् च्वनाच्वंगु दु ।
ने.सं. ११४० चौलाथ्व २ (चैत १३)
LEAVE YOUR COMMENTS