बौद्ध परियत्तिया विद्यार्थीपिंत दसिपौ लःल्हात

यल (नेपालभाषा टाइम्स) – युवक बौद्ध मण्डल, नेपाल व गोल्डेन क्लबया मंकाःरुपं संचालन जुयाच्वंगु बौद्ध परियत्ति शिक्षा २०७६ दँय् काःगु परीक्षाय् ताःलाःपिं परियत्ति बिद्यार्थीपिंत वंगु शनिबाः छगू ज्याझ्वःयासे दसिपौ व सिरपा देछाल । युवक बौद्ध मण्डलया अध्यक्ष अरणीतारा वज्राचार्यया प्रमुख अतिथिइ गोल्डेन क्लबया संयोजक यज्ञमान शाक्यया सभापतित्वय् उगु ज्याझ्वः जूगु खः ।

थुगु बौद्ध परियत्तिया १ तगिं निसें ५ तगिं तक मुक्कं ३४ बिद्यार्थीपिंसं ब्वति कयादीगु खः । ज्याझ्वलय् गोल्डेन क्लबया पूर्व संयोजक नापं वाइ.एम.बी.ए. बौद्ध परियत्ति केन्द्रया संयोजक हेरारत्न शाक्यं लसकुस यानाः न्ह्याःगु थुगु ज्याझ्वलय् परियत्ति केन्द्रया केन्द्राध्यक्ष बाबुरत्न नापितं प्रतिवेदन न्ह्यब्वयादीगु खःसा परियत्ति शिक्षा ब्वंकादीपिं गुरुपिंत नं सम्मान यायेगु ज्या जूगु खः ।

ज्याझ्वलय् यल महानगरपालिका १९ वडाया वडाध्यक्ष बिनोद ताम्राकार, ललितपुर महानगरपालिका, सामाजिक विकास समतिया दुजः एवं वडा नं. १६ का वडा दुजः सुप्रभा शाक्य, प्रमुख अतिथि युवक बौद्ध मण्डलया अध्यक्ष अरणीतारा वज्राचार्य, गोल्डेन क्लबया संयोजक यज्ञमान शाक्यपिंसं परियत्ति शिक्षायात कयाः थःपिनि नुगः खँ प्वंकादीगु खः ।

पञ्चशील प्रार्थना व बुद्ध पूजापाखें सुरु जूगु जयाझ्वलय् अन्तय् पुण्यानुमोदन यानाः ज्याझ्वः क्वचायेकूगु खः।