तबः (ताम्राकार) समाजया न्याक्वःगु तःमुँज्या
येँ (नेपालभाषा टाइम्स) – उदाय समुदाय दुनेया थीथी कवःमध्ये छगू तबः (ताम्राकार) समाजया गुक्वःगु दँमुँज्या व न्याक्वःगु तःमुँज्या वंगु शनिवाः जुल । उगु तःमुँज्यां समाजया न्हूगु ज्यासना पुचःया नं ल्यज्या याःगु खः ।
समाजया नायः सूर्यरत्न ताम्राकारया सभापतित्वय् जूगु ज्याझ्वःया उलेज्या समाजया दकलय् ज्याथःम्ह यतखा बहाः कवःया नीलकाजी ताम्राकारं यानादीगु खः । ज्याझ्वलय् मूछ्याञ्जे दिनेश ताम्राकार वार्षिक प्रगति विवरण व दांभरिं सरजु ताम्राकारं आर्थिक विवरण न्ह्यब्वयादीगु खः । अथे हे तबः मिसा पुचःया मूछ्याञ्जे लुमिन ताम्राकारं पुचःया प्रतिवेदन न्ह्यब्वयादीगु खः ।
ज्याझ्वलय् तवः जातिया पेशाकथंया ज्या याना वयाच्वनादीम्ह महाबू कवःया तारामान ताम्राकारयात नगदव हनापौ सहितया ‘भिक्षु हेरा सिरपाः’ लःल्हाःगु खः । उगु सिरपाः नांजाःम्ह बाखं च्वमि केशरमान ताम्राकारं थः मांअबुया नामं नीस्वनादीगु खः । थुकथं हे शिक्षा ख्यलय् प्लस टुलय् अप्वः ल्याः हयादीम्ह श्रवणकाजी ताम्राकारयात ‘धनलक्ष्मी सिरपाः’ एसइइ परीक्षाय् अप्वः ल्याः हयादीम्ह अरहतमान ताम्राकारयात ‘दानवीर सिरपाः’, ‘मोतिरत्न–धर्मरत्न सिरपा:’ श्रुति ताम्राकार व ‘रत्नप्रभा इन्जिनियर हना’ आयुषरत्न ताम्राकारयात लःल्हाःगु खः ।
तःमुँज्याय् उदाय समाजया न्वकु डा. सुमनकमल तुलाधर, न्यत तुलाधर समितिया नायः दीपकरत्न तुलाधर, कसाः तःधं गुथिया नायः अशोकज्योति कसाः, शिलाकार खलःया नायः उत्तमराज शिलाकार, समाजया सल्लाहकर यज्ञरत्न ताम्राकार, संस्थापक नायः अमिररत्न ताम्राकार, तबः चीभाः कवःया थकालि रत्नकाजी ताम्राकार, लिपि गुथिया नायः निरञ्जनरत्न ताम्राकार लगायतं भिंतुना न्वचुलिसें थःथःगु नुगःखँ तयादीगु खः ।
वयां लिपा निगूगु सत्रय् समाजया न्हूगु ज्यासना पुचःया ल्यज्या याःगु खः । न्हूगु ज्यासना पुचलय् प्रवेशमान ताम्राकार नायः, चिरिकः शोभा ताम्राकार न्वकु, लुमिन ताम्राकार मूछ्याञ्जे, सुरेन्द्रबहादुर ताम्राकार दांभरिं, निरजमान ताम्राकार छ्याञ्जेय् ल्यःगु दु । मूदुजलय् शान्तमुनि ताम्राकार, ज्योतिरत्न ताम्राकार, अञ्जना ताम्राकार व सुनिता ताम्राकार निर्वाचित जुयादीगु दु ।
न्हूगु ज्यासना पुचः ल्यये गु निंतिं साहित्यकार समालोचक पूर्ण ताम्राकारया संयोजकत्वय् वीन्द्ररत्न ताम्राकार दुथ्याःगु निर्वाचन कमिटी गठन याःगु खः । न्हूगु ज्यासना पुचःया निर्वाचन कमिटीया कजि पूर्ण ताम्राकारं दसिपौ व दुजः रवीन्द्रमानं खादा क्वखायेकादीगु खःसा तबः मिसा पुचःया नायः प्रफुल्लकमल ताम्राकार, मन्दिरा ताम्राकार, उर्मिला ताम्राकार लगायतं नं सिन्हः तिकाः भिंतुना देछानादीगु खः ।
उदाय म्येँ हाये काः न्ह्याःगु तःमुँज्याय् न्वकु प्रवेशमान ताम्राकारं लसकुस यानादीगु खः ।
LEAVE YOUR COMMENTS