आर्थिक अनियमिततायात कयाः देय् दबूयात सिडिओया पौ

येँ ÷ जिल्ला प्रशासन कार्यालय येँ (सिडिओ ज्याकू) नं नेवाः देय् दबू (नेवार राष्ट्रिय संगठन)या नायः नरेश ताम्राकारयात आर्थिक अनियमितता याःगु खँय् स्पष्टिकरण पेश यायेत पौ छ्वयाहःगु दु । दबूया कोषाध्यक्ष अन्जिता खड्गीं दबूया ध्यबा आर्थिक अनियमितता जूगु धकाः बिउगु उजुरीइ सिडिओ ज्याकुथिं स्पष्टीकरण बीत पौ छ्वयाहःगु खः ।

दबूया कोषाध्यक्ष खड्गीं देय् दबुली आर्थिक अनियमितता जुयाच्वंगु व थःत विधान विपरीत कोषाध्यक्ष पदं चिइकाः केन्द्रीय दुजः दयेकूगु विरुद्ध सिडिओ ज्याकुथिइ उजुरी तःगु खः । वय्कलं थ्व सम्बन्धय् छुं न्हि न्ह्यव पत्रकार सम्मेलन यानाः नं जानकारी बियादी धुंकूगु दु ।

सिडियो ज्याकूया प्रशासकीय अधिकृत सुजन फागो लिम्बुं हस्ताक्षर यानाः छ्वयाहःगु पतिइ आर्थिक दँ २०७४÷७५ व २०७५÷७६ या चैत तकया आय व्यय विवरण, आःतक जूगु निर्णयया म्यान्युट व कोषाध्यक्ष खड्गीयात विधानया गुगु बुँदाया आधारय् चिइकागु खः धयागु विवरण सहित स्पष्टिकरण छ्वयाहयेत धयातःगु दु ।

सम्बन्धित बुखँ

LEAVE YOUR COMMENTS