सोमवाः नेपालं समूह चरणया अन्तिम कासा म्हितीगु

येँ – विश्वकप टि–२० छनोटया समूह चरणया अन्तिम कासाय् नेपालं सोमवाः क्यानाडालिसे म्हितेत्यंगु दु । ओमनया अल अमेराट क्रिकेट मैदानय् नेपाःया ईकथं ३ः४५ ताः इलय् जुइगु थ्व कासा त्याकल धाःसा नेपाः सेमिफाइनलय् थ्यनी । समूह चरण अन्र्तगत जूगु निगू कासा त्याकाः नेपाः शीर्ष थासय् दु । नेपालं न्हापांगु कासाय् ओमानयात ३९ रनं व निगूगु कासाय् फिलिपिन्सयात ११८ रनं बुकूगु खः ।

समूह चरणया अन्तिम कासाय् क्यानाडायात बुकल धाःसा नेपालं समूह विजेता जुयाः सेमिफाइनलय् थाय् दयेकी, तर क्यानाडालिसे बुतः व ओमानं फिलिपिन्सयात बुकल धाःसा रनरेटया आधारय् नेपाः, ओमान व क्यानाडा मध्ये निगू टिमं सेमिफाइनलय् थाय् दयेकी । नेपाःया रनरेट बांलाःगुलिं क्यानाडालिसे बूसां सेमिफाइनलय् थाय् दयेकीगु सम्भवाना दनि ।

अथेहे नेपालं क्यनाडायात बुकल तर ओमान फिलिपिन्सलिसे बुतः धाःसां नेपाः सेमिफाइनलय् थ्यनी । रनरेटया आधारय् क्यानाडा, ओमान व फिलिपिन्स मध्ये छगू टिम सेमिफाइनलय् थ्यनी ।

समूह ए पाखे धाःसा च्वंगु युएइ, आयरल्याण्ड, बहराइन व जर्मनी प्यगुलिं टिमया सेमिफाइनलया सम्भावना दनि । युएइं निगू कासा त्याकाः सेमिफाइनलय् थाय् दयेकेगु लँपु बल्लाकेधुंकूगु दुसा निगुलिं कासा बूगु जर्मनीया सम्भावना धाःसा म्हो जक दु ।

निगुलिं समूहया शीर्ष निगू टिमं सेमिफाइनलय् थाय् दयेकीसा फाइनलय् थ्यंगु निगू टिमं विश्वकपय् थाय् दयेकी ।

सम्बन्धित बुखँ

LEAVE YOUR COMMENTS