‘कोरोना संक्रमण छगू लाख थ्यनेफु’

येँ (नेपालभाषा टाइम्स) – सरकारं नेपालय् कोरोना भाइरसया संक्रमण जुइपिनिगु ल्याः छगू लाख थ्यनेफइगु अनुमान याःगु दु । थौंकन्हय् संक्रमित जुयाच्वंगु दरयात आधार दयेकाः स्वास्थ्य मन्त्रालयं उगु हे कथं तयारी ज्या न्ह्याकागु खँ स्वास्थ्य मन्त्रालया सचिव लक्ष्मण अर्यालं जानकारी बियादीगु खः ।

देय्न्यंक म्हीग बहनी तक ९५६१ म्हे सिति कोरोना भाइरस संक्रमण जूगु पुष्टि जुइधुंकूगु दु । न्हिथं प्यसः स्वयां अप्वः मनूत संक्रमित जुयाच्वंगु दु । म्हिगः न्हिछिया दुने जक ५३५ म्हेसिके कोरोना जूगु पुष्टि जूगु खः । सरकारं लकडाउनया मोडालिटी हिले धुंकाः संक्रमणया ल्याः न्हियान्हिथं थहां वनाच्वंगु दु ।

अझ नं नेपालय् परीक्षण दर धाःसा म्हो हे जुयाच्वंगु दु । परीक्षण म्हो जूगु कारण जक थौंकन्हय् संक्रमितया ल्याः प्यसः न्यासःजक खनेदयाच्वंगु खँ मन्त्रालयया विज्ञतय्सं हे धायेगु यानाच्वंगु दु ।

म्हिगः संसदया सार्वजनिक लेखा समितिइ वासः न्यायेगु विषयय् जूगु सहलहया निंतिं सःतूम्ह स्वास्थ्य सचिव अर्यालं देशय् संक्रमिततय् ल्याः छगू लाख थ्यनेफुगु धयादीगु खः । सहलहया झ्वलय् सचिव अर्यालं धयादिल, ‘९१ हजार मनूतय्त संक्रमण जुइ फइगु अनुमान दु । उगु हे कथं तयारी यानाच्वनागु दु ।’

थौंकन्हय् देय्न्यंकं थ्यमथ्यं ९५ हजार मनूत क्वारेन्टाइनय् च्वनाच्वंगु दु । उकथं हे ७ हजार २ सय मनूतय्त थीथी अस्पतालया आइसोलेसनय्त यातःगु दु ।

थ्वहे झ्वलय् सरकारं कोरोना संक्रमण परीक्षणया निंतिं पीसीआरया दायरा अप्वयेकेगु तयारी यानाच्वंगु दुसां माक्व प्रयोगशाला व मेसिन मदुगुलिं इलय् परीक्षण जुइ फयाच्वंगु मदु । भारतं नेपाः दुहां वइपिं नेपाःमि म्हो जूसां नं दुहां वयेगु धाःसा मदिउनिगुलिं यानाः संक्रमित अप्वये फइगु अनुमान सरकारं याःगु खः । भारतया महाराष्ट्र व दिल्लीइ दकलय् अप्वः संक्रमण न्यनाच्वंगु दुसा नेपाः दुहां वइपिं नेपाःमि नं उगु हे क्षेत्रं अप्वः वयाच्वंगु दु ।

सचिव अर्यालया कथं थौंकन्हय् नं १८ हजार स्वयां अप्वः स्वाब संकलन जुयाच्वंगु दु । तर उकियात परीक्षण याये फयाच्वंगु मदु । म्हिगः तक थप १८ हजार स्वाब परिक्षण याये ल्यं दनीगु जानकारी नं वय्कलं बियादिल । वय्कलं स्वाब संकलन जूकथं परीक्षण यायेगु ज्या धाःसा मजुयाच्वंगु खँ नं स्वीकार यानादीगु दु ।

समितिइ न्ववायेगु झ्वलय् वय्कलं संक्रमितया ल्याः अप्वया वनाच्वंसां नं गुकथं व्यवस्था यायेगु धइगु समस्या जुयाच्वंगु दु । सरकारं विदेशं उद्धार यानाहःपिंत तकं गुकथं व्यवस्थापन याये गु धइगु स्पष्ट नीति दयेके फयाच्वंगु मदु ।