महेश्वरयात ग्वाहालि यायेगु दाहालया भलसा

येँ – विश्व बडी बिल्डिङ कासाय् स्वर्ण पदक त्याकाः नेपाःया प्रतिष्ठा तयादीम्ह कासामि महेश्वर महर्जनयात म्हिगः नेकपाया अध्यक्ष पुष्पकमल दाहालं थःगु हे छेँय् सःताः नापलानादिल । वय्कलं महर्जनया थ्व कीर्तिमानं विश्वय् नेपाः व नेपाःमियात म्हसीकेत तःधंगु योगदान जूवंगु बिचाः तसें उकिया लागिं वय्कःयात यक्व सुभाय् बियादीगु खः ।

उगु इलय् कासामि महर्जनं थाइल्याण्डय् जूगु थ्व कासा थःगु व्यक्तिगत कुतलं ब्वति कयागु जानकारी बिसें आः जुइगु मिस्टर युनिभर्स कासाय् नं ब्वति कायेत थः इच्छुक जुयागु खँ कनादीगु खः । अध्यक्ष दाहालं उकिया लागिं थम्हं कुतः यायेगु बचं बियादिल ।

थ्वहे झ्वलय् कासामि महर्जनयात म्हिगः ज्यापु महागुथि येँ महानगर समितिं छगू तःजिगु ज्याझ्वः यासें देय् चाःहीकेगु ज्या यात । येँया बसन्तपुली येँ मनपाया मेयर विद्यासुन्दर शाक्यं उलेज्या यानादीगु छगू ¥यालीपाखें महर्जनयात गाडीइ तयाः देय् चाःहीकूगु खः । उकी आपालं बाजं खलःतय्सं नं ब्वति काःगु खः ।

महर्जनं अन्तर्राष्ट्रियस्तरया कासा त्याका वःसां वय्कःयात सरकारीस्तरं खास सम्मान मयाःगु खँय् धाःसा थन आक्रोश ब्वलनाच्वंगु दु ।
थ्वहे झ्वलय् पुलांम्ह प्रधानमन्त्री लिसें नयाँ शक्ति पार्टीया अध्यक्ष डा. बाबुराम भट्टराईं नं ट्विट मार्फत मिस वल्र्डय् ब्वति काः वंम्ह मय्जुया ब्रम्हाण्ड हे थर्के जुइक चर्चा जुल, तर देशया लागिं स्वर्ण पदक त्याका वःम्ह कासामि महर्जनया बारे धाःसा छाय् चाइँचुइँ हे मदुगु धासें महर्जनयात बधाई बियादीगु दु ।