अप्पा भट्टा बन्द याकेत आन्दाेलन

येँ – येँया निगू नगरपालिकाय् अप्पा भट्टा चायेकातःगु विरोधय् स्थानीय वासिन्दां आन्दोलनया घोषणा याःगु दु । अप्पा भट्टा पीडित मूल संघर्ष समितिं आन्दोलनया घोषणा याःगु खः ।चन्दागिरी नगरपालिका व किपू नगरपालिकाय स्थानीय वासिन्दाया भेलां नीस्वंगु संघर्ष समितिं नगरपालिकां हे बन्द यायेगु धकाः निर्णय यायेधुंकूगु अप्पा भट्टा सञ्चालन जुयाच्वंगु धासें आन्दोलन न्ह्याकूगु खः ।

अप्पा भट्टा पीडित मुल संघर्ष समितिया संयोजक मुकुन्दपसाद घिमिरेया कथं येँ जिल्लाया प्रमुख अधिकारीया कार्यकक्षय् चन्दागिरी व किपू नगरपालिकाया मेयरलगायत पदाधिकारी, अप्पा भट्ट पीडित स्थानीय संघर्ष समिति व अप्पा भट्टा सञ्चालकतय् दथुइ जूगु सहमतिइ जनप्रतिनिधि हे अप्पा भट्ट चीकेगु सहमति जूगु खःसां नं सहमति कथं ज्या मजूगु धासें आन्दोलन घोषणा याःगु खः ।

मेखे चन्द्रागिरी नगरपालिकाया प्रमुख घनश्याम घिरी धाःसा मापदण्ड पूमवंगु अप्पा भट्टयात बन्द यायेगु कथं थम्हं नगरपालिकाया बोर्ड बैठकय् प्रस्ताव तयेगु ज्या न्ह्याकेत्यनागु धासें अप्पा भट्टा सञ्चालकपिंत छुं ई बियाः बन्द यायेगु तयारी जुयाच्वंगु खँ कनादीगु दु ।

वय्कःया कथं सरकारं क्वःछिनातःगु मापदण्डयात स्वीकार याइगु भट्टयात सञ्चालन याकेगुलिं छुं समस्या मदुगु धासें आः मापदण्ड अःखः सञ्चालन जुयाच्वंगु भट्टां जक वातावरण दुषित जुयाच्वंगुलिं उकियात नियन्त्रण यायेगु निंतिं चन्द्रागिरी नगरपालिकां माःगु तयारी यानाच्वंगु जानकारी बियादीगु दु ।

सम्बन्धित बुखँ

LEAVE YOUR COMMENTS