तार व्यवस्थापन यायेत इनाप

येँ – नेपाल दूरसंचार प्राधिकरणं स्वनिगःया सहरी क्षेत्रय् अव्यवस्थित व अलपत्र अवस्थाय् लानाच्वंगु तार उचित व्यवस्थापन यायेत इनाप याःगु दु । प्राधिकरणं स्वनिगःया सतक सिथय् अलपत्र अवस्थाय् लानाच्वंगु तारया तत्काल उचित व्यवस्थापनया निंतिं इनाप याःगु खः । सतकया सिथय् तयातःगु टेलिफोन व मतया लठ्ठाय् तयातःगु व थाय्थासय् यग्गानाच्वंगु अनधिकृत तार व्यवस्थापनया निंतिं प्राधिकरणं इनाप याःगु खः ।

उकथं अनधिकृत व असुरक्षित तारं सहरी सौन्दर्यता स्यंकाच्वंगु खँ न्ह्यथँसें प्राधिकरणं तत्काल उकिया उचित व्यवस्थापन यायेत प्राधिकरणं इनाप याःगु खः । अव्यवस्थित व अलपत्र अवस्थाय् थाय्थासय् यग्गानाच्वंगु तारं मिं नइगु घटना, विद्युतीय झट्का बीगु व लँजुवाः नापं सवारी साधनय् यात्रा यानाच्वंपिं तकं दुर्घटना लानाच्वंगु धासे प्राधिकरणं अनाधिकृत तारया व्यवस्थापन तत्काल यायेत इनाप याःगु खः ।

प्राधिकरणं मतयाल लठ्ठाया स्वामित्व दुगु नेपाल विद्युत प्राधिकरण व नेपाल टेलिकमलिसे आवश्यक समन्वय यानाः लछिया दुने अज्याःगु दक्वं तार व्यवस्थापन यायेत इनाप याःगु खः । क्वःछिनातःगु ईया दुने तार व्यवस्थापन मयात धाःसा प्राधिकरणं कानूनकथं कारवाही यायेगु जुइ धकाः नं धाःगु दु ।