समस्याग्रस्त सहकारीइ तयातःगु न्यागू लाख तक बचत लित बीगु व्यवस्था याइगु, आलु प्याजया भ्याट खारेज

येँ (नेपालभाषा टाइम्स)- सरकारं वइगु आर्थिक दँ २०८१÷८२ या निंतिं १८ खर्ब ६० अर्ब ३० करोड तकाया बजेट हःगु दु । अर्थमन्त्री वर्षमान पुनं मंगलवाः प्रतिनिधि सभा व राष्ट्रिय सभाया मंकाः बैठकय् बजेट न्ह्यब्वयादीगु खः । थुगुसी सरकारं हःगु बजेट चालु आर्थिक दँया स्वयां ६.२ प्रतिशतं अप्वः खः ।

सरकारं वइगु आर्थिक दँय् चालु पाखें ११ खर्ब ४० अर्ब ६६ करोड बजेट फ्याःगु दुसा पुँजीगतपाखे ३ खर्ब ५२ अर्ब ३५ करोड फ्याःगु दु । अथेहे वित्तीय व्यवस्थापनया निंतिं ३ खर्ब ६७ अर्ब १८ करोड तका तःगु दु । सरकारं हःगु बजेट पुँजीगत खर्च स्वयां चालु खर्च स्वदुगं अप्वः दुसा त्यासा पुलेगु निंतिं फ्याःगु बजेट हे पुँजीगत खर्च स्वयां अप्वः दु । पुँजीगत खर्च धयागु विकास निर्माणया निंतिं याइगु खर्च खःसा चालु खर्च सरकारी कर्मचारीतय्त तलब बीगु निंतिं व प्रशासनिक ज्याया निंतिं जुइगु खर्च खः ।

संघीय सरकारं प्रदेश व स्थानीय तहय् चालु आर्थिक दँया स्वयां मुक्कं २७ करोड तका जक अप्वः अनुदान बीगु जूगु दु । सरकारं प्रदेश व स्थानीय तहया निंतिं हस्तान्तरणया निंतिं ४ खर्ब ८ अर्ब २७ करोड विनियोजन याःगु खः । चालु आर्थिक दँय् थ्व ध्यबा ४ खर्ब ८ अर्ब दुगु खः ।

बजेटया निंतिं सरकारं १२ खर्ब ६० अर्ब ३० करोड तका राजश्व म्हयेगु लक्ष्य तःगु दुसा आन्तरिक त्यासापाखें ३ खर्ब ३० अर्ब, वैदेशिक त्यासापाखें २ खर्ब १७ अर्ब ६७ करोड हयेगु व वैदेशिक अनुदान पाखें ५२ अर्ब ३३ करोड तका हयेगु लक्ष्य तःगु दु ।

बजेटया मू मू कार्यक्रम
– समस्याग्रस्त सहकारी न्यागू लाख तक बचत यानातःपिंत सहकारीया संचालक व एकाघरया दुजःया नामय् दुगु सम्पत्ति धितो सुरक्षण कयाः ध्यबा लित बीगु व्यवस्था याइगु । सहकारी नियमन यायेत नियामक निकाय स्थापना यायेगु ।
– आलु, प्याज, स्याउ लगायत तरकारी व सिसाबुसाय् कयातःगु भ्याट खारेज । अय्लाः, वियर, सूर्ति व चुरोटय अन्त शुल्क दर वृद्धि
– किपू, बन्दीपुर, बुंग,थिमि, गोरखा, जनकपुर व मटिहानी लगायतया थाय्या इतिहास, संस्कृति, भाषा व सभ्यताया संरक्षण व सम्वद्र्धनया निंतिं थीथी ज्याझ्वः याइगु ।
– जानकी देगःयात विश्व सम्पदा धलखय् दुथ्याकेत पहल याइगु व सिम्रौनगढयात विशेष रुपं संरक्षण याइगु ।
– प्रधानमन्त्री रोजगार कार्यक्रम पाखें निगू लाख मनूतय्त म्होतिं नं सछि न्हुया निंतिं ज्या बीगु ।
– आकिवं १६ लाख पर्यटक दुत हयेगु लक्ष्य
– थुगु आर्थिक दँयात सुचना प्रविधि दशकया प्रस्थान विन्दु कथं न्ह्याकीगु । झिदँया दुनेसूचना प्रविधि क्षेत्रपाखें ३० खर्ब तका बराबरया निर्यात यायेगु व न्यागू लाखयात प्रत्यक्ष व झिगू लाखयात अप्रत्यक्ष रोजगारी सिर्जना यायेगु ।
– थुगु आर्थिक दँय् ९०० मेगावाट मत राष्ट्रिय विद्युत प्रणालीइ थप यायेगु ।
– कृषि लगानी दशकया घोषणा । हिमाल व पहाडय् ५० रोपनी स्वयां अप्वः व तराईलय् १० विघा स्वयां अप्वः जग्गा एकीकरण यानाः कृषि ज्या यात धाःसा ब्याज अनुदान, मेशिनरी आयातय् छुट व प्राविधिक ग्वाहालि बीगु ।
– चोभारय् सार्वजनिक निजी साझेदारी अन्तर्गत अन्तर्राष्ट्रियस्तरया प्रदर्शनी स्थल दयेकीगु ।
–नेपाली समाजया मौलिकता न्ह्यब्वइगु कथनयात नेपाली व थीथी मांभासं मस्तय्सं स्वइगु, ब्वनीगु न्यनीगु सामग्री दयेका प्रचारण याइगु ।
– किपूया वर्न अस्पतालया पूर्वाधार विकास याइगु, पाटन अस्पतालय् स्येँ प्रत्यारोपण सेवा विस्तार याइगु ।
– धोबिकाट, बालकुमारी व सल्लाघारीइ फोहर लः प्रशोधन केन्द्र दयेकीगु ।
– राष्ट्र निर्माणय् युवा परिचालन ः छगू लाख ल्याय्म्हतय् रोजगारी सुनिश्चित याइगु ।
– राष्ट्रियस्तरया ८० गू खेलकूद धेंधेंबल्लाः ग्वसाः ग्वइगु, इस्पोर्टसया अन्तर्राष्ट्रिय धेंधेंबल्ला याइगु ।
– मुलपानी क्रिकेट रंगशाला व विराटनगरया गिरिजाप्रसाद कोइराला रंगशालायात राष्ट्रिय गौरवया आयोजनाकथं दयेकीगु ।
– थुगु आर्थिक दँयात मिस्तय्गु निंतिं लगानी वर्ष कथं हनीगु ।
– सुनकोशी व नारायणी खुसिइ जलमार्ग निर्माण सुरु याइगु ।
– प्रादेशिक राजधानीइ मौलिक सहर विकासया सम्भाव्यता अध्ययन याइगु ।
–स्वनिगः व मेगु सम्भाव्य थाय्या जग्गा विकासयानाः सुपथ मूल्यय् ५० हजार आवास विकास याइगु । न्हापांगु चरणय् काठमाडौं उपत्यका विकास प्राधिकरणं प्रस्ताव यानातःगु न्हूगु सहर कार्यक्रम संचालनय् हइगु ।
– घना बस्तीइ खुला क्षेत्र पहचिान यानाः छगू वडा छगू पार्क दयेकीगु ।
– आलु, प्याज, स्याउ लगायत तरकारी व सिसाबुसाय् कयातःगु भ्याट खारेज । अय्लाः, वियर, सूर्ति व चुरोटय अन्त शुल्क दर वृद्धि

 

सम्बन्धित बुखँ

LEAVE YOUR COMMENTS