दार्चुलाय् डा. गोविन्द केसीया अनशन सुरू

येँ – स्वास्थ्य क्षेत्रया सुधारया माग तया आन्दोलित डा. गोविन्द केसी दार्चुलाय् वना हानं अनशन सुरु यानादीगु दु । डा. केसीं स्वंगू बुँदे माग यासें दार्चुलया सदरमुकाम खलंगाय् अनशन सुरु याःगु खः । मंगलवाः सुथय् अनशन सुरु यासें डा. केसीं स्वास्थ्य, शिक्षा, रोजगारी नापं भारतं मिचे याःगु नेपाःया भूभाग लितहयेमाःगु माग नं याःगु दु । अनसन जेठ २१ गते तक न्ह्याइगु खँ धाःगु दु ।

डा. केसी छगू विज्ञप्ति पिथनादिसें धाथें राष्ट्रियता क्वःतुकेगु खःसा देय्या सीमा रक्षा यायेगु खःसा येँया सतकय् नारा बिया वा बालुवाटार दरबारपाखें न्ववाना मगाइगु खँ धयादीगु दु ।

डा. केसीपोखं न्ह्यब्वःगु स्वंगू बुँदे माग थुकथं दु :

१. दार्चुला व मेमेगू सीमा क्षेत्र लगायत देय्न्यंकया मनूतय् निंतिं यातायातया सहज पहुँच निर्माण यायेगु नापं गुणस्तरीय स्वास्थ्य, शिक्षा व रोजगारी व्यवस्था यायेमा ।

२. भारतपाखें मिचे याःगु नेपाःया भूमि लितकायेगु प्रक्रिया तत्काल सुरु यायेमा ।

३. गण्डकी प्रदेशलगायत डडेल्धुरा, बर्दिवास, उदयपुर, इलाम लगायतया थासय् सरकारी मेडिकल कलेज चायेकेगु प्रक्रिया द्रुत गतिं न्ह्याकेगु, गेटा मेडिकल कलेजयात तुरुन्त सञ्चालनय् हयेगु नापं कर्णाली व राप्ती स्वास्थ्य विज्ञान प्रतिष्ठानय् याकन एमबीबीएस ज्याझ्व सञ्चालनया व्यवस्था यायेमा । नापं न्हापाया सत्याग्रहया मागत पूरा यायेमाःगु व थःपिं नाप न्हापा जूगु फुक्कं सम्झौता कार्यान्वयन यायेमा ।