धर्मय् सिफारिस चले जुइमखु

त्रिरत्न मानन्धर “सद्धम्म कोविद”

थम्हं मिहेनत याये म्वायेक शक्तिकेन्द्रया चाकरी यानाः, सिफारिस कयाः थीथी ज्याखँ सम्पादन यायेगु प्रवृति मनूतय्के दयाच्वनी । सिफारिसया बोलबाल जुयाच्वंगु वर्तमान अवस्थाय् थःगु क्षेत्रय् सफल जुइगु निंतिं सिफारिस याकेत जुयाच्वनीगु स्वाभाविक खः । ध्यबा कमे यायेगु, नां कमे यायेगु, पद प्रतिष्ठा प्राप्त यायेत मनूतय्सं म्हसिउपिं प्रभावशाली थःथितिपिं, अधिकारीत, राजनैतिक पार्टीया नेतात आदिपिनि बः कयाः उमिपाखें सिफारिस याकाच्वनी, अले थःगु आज्जु पूवंका च्वनी ।

म्हसिउपिं नातागोता, राजनैतिक पार्टीया नेतात मदुसा आर्थिक प्रलोभन बियाःसां सिफारिस याकाः थःगु स्वार्थ सिद्ध यानाच्वनी । मिहेनत व इमान्दार जुयाःसिबें सिफरिसया आधारय् उन्नति याये अःपुयाच्वंगु थुगु अवस्थाय् धार्मिक आज्जु पूवंकेत नं थुकथंया ‘सर्टकट’ उपलव्धया कामना याइपिं दइगु स्वाभाविक जुल ।

विभिन्न देवदेवतायात लय्तायेके फत धाःसा जीवनय् द्यवं सुख सम्बृद्धिया लागिं सिफारिस यानाबीगु थीथी धार्मिक आख्यान ला लोक व्यवहारय् प्रचलित हे जुयाच्वंगु दु । देगलय् वनाः द्यः दर्शन यानाः पापमोचन यायेगु ज्याखँय् नं शर्टकटया माध्यमं अप्वः ध्यबा पुलाः याकनं द्यः दर्शन यायेगु व्यवस्था गुलिं सम्प्रदायय् दयाच्वंगु खंकेफु ।

थुकथं थीथी आचरण, अभ्यास व चर्यापाखें जक सम्भब दइगु आध्यात्मिकता विकासया लागिं नं सिफारिस याकेगु प्रवृति ब्वलना च्वंगु दु । तर छु सिफारिस यायेवं धार्मिक ज्याखँ पूवनीगु खःला । गन तक धर्म धयागु चित्तया एकाग्रता व क्लेश शुद्ध यायेगु ज्याखँ नाप सम्बन्ध दु अन छुं नं कथं सिफारिस, भनसुन, नातावाद, कृपावादया गुन्जायस दइमखु ।

म्हसिउम्ह मनू दु, शक्तिशाली नेता थःगु ल्हाती दु धकाः अले अपार धन सम्पत्तिया प्रलोभन क्यनाः धर्मया आज्जुइ थ्यंके फइमखु । नितान्त थःगु हे स्वतन्त्र प्रयास अन आवश्यकता जुयाच्वनी । मेपिनिगु बः कयाः थहां वनेगु अन सम्भव दइमखु । बुद्धया धापू कथं मनूत मुक्त जुइगु वा निर्मल जुइगु लागि थज्याःगु तिकडम ज्या वइमखु ।

आध्यात्मिकताया विकास यायेगु धयागु थः दुनेया मनोविकारयात मदयेकेगु खः । संसारय् गुलि नं प्रकारया दुःख, पीडा, समस्यात वयाच्वनी उकिया मू हुनि धयागु हे मनोविकार नाप सम्बन्धित खः । मनयात थासय् तयेफःसा दुःख, पीडा व शोकया अवस्था हटे जुयावनीगु जुयाच्वन ।

‘थःहे थम्ह नाथ खः’, ‘थःहे थःगु गतिया कारण खः’ धयागु बुद्ध बचन अनुसार मेपिनिगुपाखें याःगु कुतलं थःगु भिं जुइ, कल्याण जुइ धकाः बिचाः यायेगु हे बेकार खः । थःगु भिं चाहना याइपिं मनूतसें थम्हं हे कुतः यायेमाः व मेपिनिगु निगाह पाखें थःगु कल्याण मजुइगु खँ कनाबिज्याःगु दु । भगवान बुद्धया इलय् मनूत थीथी थासय् शरणय् वनाः थःगु कल्याणया कामना यानाच्वनीगु जुयाच्वन ।

गुलिं पर्वतय् वनाः, गुलिं बनय् वनाः, गुलिं उद्यान, सिमा आदि थासय् पुजा यानाः थःगु कल्याण जुइ वा उगु विभिन्न विषयवस्तु पाखें थःगु भिं व उन्नति जुइ धकाः विश्वास यानाच्वनीगु जुयाच्वन । बुद्धं अजाःपिनिगु कृर्याकलापयात संकेत यानाबिज्यासें धयाबिज्यागु खः ।

बहु वे शरणं यन्ति पव्बतानि वनानि च, आरामरुक्खचेत्यानि, मनुस्सा भय तज्जिता
ने तं खो शरणं खेम ंनेतंशरणमुत्तमं ,नेतं शरणामागम्म सब्बदुक्खा पमुच्चति
अर्थात
आपालं मनूत भयया कारणं पर्वत, वन, उद्यान, सिमा, तिर्थ स्थान आदि थासय् वनाः शरण काःजुयाच्वनी । तर अन शरण काःवनेगु धयागु उत्तम शरण मखु, अन शरण वनाः दुःखं छुटकारा नं जुइमखु ।

‘अजाःगु थासय् शरण काःवनेगु धयागु दुःख मदयेका बीमा धकाः सिफारिस काःवनेगु थें जक खः । तर उगु गुगुं पक्षपाखें सिफारिस जुइमखु । धात्थें दुःखं मुक्त जुइगु खःसा बोधिया शरण वनेगु खः, धर्मया शरण वनेगु खः, धर्मयात ध्वाथुइके फुपिनिगु शरण वनेगु खः । सपोलपिनिगु शरणय् वनाः प्राप्त जूगु मार्गदर्शन अनुसार थम्हं चर्या याःसा तिनि दुःख, पीडा, रोग, शोक मदया वनी ।

यायेमाःगु चर्या थम्हं हे यायेफःसा तिनि आज्जइ थ्यंकेफइ’ बुद्धं धयाबिज्याःगु दु । व आज्जुइ थ्यंकेत वलपोलं धयाबिज्याःगु शीलया लँ, समाधिया लँ व प्रज्ञाया लँ हे लीमाःगु अपरिहार्यता वसपोलं कनाबिज्यात । छम्हेस्यां शील पालन यानाः उकिया अंश मेपिंत वइगु जुइमखु । ध्यान भावनाया अभ्यास व प्रज्ञा प्राप्तिया ज्या नं अथेहे खः ।

थुकथं आध्यात्मिक प्रगति यानाः सुख शान्तिया जीवन हनेत सक्षम जुइकेत सुयागुं सिफरिस चले जुइमखु । सिफारिसकर्ता नं दइमखु । थःहे थःगु सिफारिसकर्ता खः । थम्हं यानागु आचरण चर्यां हे निश्चित थासय् थ्यंकी, सुयागुं आशिर्वाद व सिफारिसं मखु । भगवान बुद्धं सुयातं निश्चित थासय् थ्यंकेगु जिम्मा कयाबिज्याःगु मदु । सुयातं स्वर्गया सिफारिस यानाबिज्याःगु मदु ।

वसपोलया धापू कथं सुं नं मनूयात निश्चित थासय् थ्यंकाबीगु जिम्मेवारी सुनानं कायेफइमखु । उम्ह मनूयात मात्र मार्ग क्यना बीफै । निश्चित थासय् थ्यंकेत उम्ह मनुखं थम्हं हे प्रयास यायेमाः । वसपोलं धयाबिज्याइ–
तुम्हेहि किच्चं आतप्पं अक्खातारो तथागता
ज्या थम्हं हे यायेमा, तथागत धयापिंसं मात्र लँपू जक क्यना बी ।

आध्यात्मिकताया विकास यायेगु धयागु थः दुनेया मनोविकारयात मदयेकेगु खः । संसारय् गुलि नं प्रकारया दुःख, पीडा, समस्यात वयाच्वनी उकिया मू हुनि धयागु हे मनोविकार नाप सम्बन्धित खः । मनयात थासय् तयेफःसा दुःख, पीडा व शोकया अवस्था हटे जुयावनीगु जुयाच्वन । थुगु महान आजुइ थ्यंकेत थम्हं हे प्रयास यायेगु जुयाच्वन । सांसारिक ज्याखँ थें थुगु उद्देश्य पुरा यायेत छुं नं कथंया सिफारिस नातावाद कृपावाद चलेमजुइगु खँ भगवान बुद्धं त्याज्जिक हे धयाबिज्याःगु खः ।

 

सम्बन्धित बुखँ

LEAVE YOUR COMMENTS