छाय् थहां वन खाया लाया भाः ?

स्वनिगः पिनें खाया आयात मजुइवं खाया लाया भाः थहां वंगु दु । सरकारं लकडाउन शुरु यायेवं आपालं स्वनिगःया किसानतय्सं ब्रोइलर खाः लहीगु त्वःतेवं खाया आः वयाः अभाव जूगु खँ किसानतय्सं धाःगु दु ।

किसानतय् कथं लकडाउन शुरु जुइवं खायात माःगु दाना अभाव जूगुलिं किसानतय्सं थःपिंके दुगु चल्ला तकं स्यानाः ल्हाकाबिउगुलिं यानाः स्वनिगलय् खाया अभाव जूगु खः । स्वनिगलय् सर्लाही, सप्तरी आदि जिल्लां नं खा आयात जुयाच्वंगु खःसा सरकारं थुगु जिल्लां स्वनिगलय् खा हयेके मबिउगुलिं नं थप अभाव जूगु खँ व्यापारीतय्सं धाःगु दु ।

न्हापा न्हापा चितवनं स्वनिगलय् खा हयेगु यानाच्वंगु खःसा चितवनया खाया गुणस्तर म्हो जूगुलिं व्यापारीतय्सं खा आयात यायेगु नं म्हो याःगु खः । म्हीग तक ब्रोइलर प्रतिकिलो ३४० तका मियाच्वंगु खःसा म्हिगः हाकनं भाः थहां वनाः ३७० तका थ्यंगु दु ।

मेखे बजारय् खाःया अभाव जुइवं आपालं धयाथें थोक व्यापारीतय्सं फ्रोजन यानातःगु ला मीगु शुरु याःगु दु । येँया आपालं धयाथें पसलय् थौंकन्हय् फ्रोजन ला मियाच्वंगु दु । तर येँया उपभोक्तापिंसं धाःसा फ्रोजन ला उलि ययेकूगु खनेमदु ।