डलरया तुलनाय् ने.रु. तसकं कमजोर

येँ -नेपाःया ध्यबा निरन्तर रुपं कमजोर जुयाः न्हूगु रेकर्ड कायम जूगु दु । नेपाल राष्ट्र बैंकं १ डलर बराबर नेपाःया ध्यबा ११६.२३ तका क्वःछिउगु दु । थ्व आः तकया उच्चदर खः । अमेरिकी डलरलिसे भारतीय ध्यबा कमजोर जुइवं उकिया लिच्वः नेपाःया ध्यबाय् लाःगु खः । नेपाः व भारत दथुइ स्थिर विनिमय दर कायम जुयाच्वंगु दु ।

भारतीय रिजर्भ बैंक (आरबीआईं) मंगलवाःया निंतिं १ डलर बराबर ७२.६७ भारु क्वःछिउगु खः । थ्व भाः अझ थहां वनाः प्रति डलर बराबर ७५ भारु थ्यनीगु अनुमान जुयाच्वंगु दु । वंगु वैशाखय् प्रति १ अमेरिकी डलर बराबर १०६.३८ तका जुयाच्वंगु खःसा न्यालाया दुने नेपाःया ध्यबा झितका कमजोर जूगु दु । अमेरिकी राष्ट्रप्रति डोनाल्ड ट्रम्पं आयकर दर म्हो याःगुलिं विदेशय् जुयाच्वंगु अमेरिकी लगानी स्वदेशय् लिहां वनेगु शुरु जूगुलिं उकिया लिच्वः विश्व बजारय् लाःगु विश्लेषकतय्सं धाःगु दु । ट्रम्प प्रशासनं कर्पोरेट कर कटौती यायेवं अर्बौ डलर अमेरिकाय् दुहां वंगु विश्लेषकतय्सं धाःगु दु ।

डलरया भाः थहां वनेवं आः पेट्रोलियम पदार्थया भाः नं थहां वनीगु सम्भावना ब्वलंगु दु । डलरया भाः थहां वंगुलिं विदेशं आयात यायेमाःगु मालसामानया भाः नं थहां वनीगु निश्चित जूगु दु । लिसें देशं कयातःगु त्यासा पुलेगु निंतिं नं आपाः बजेट फ्यायेमालीगु अवस्था ब्वलंगु दु ।

डलरया भाः थहां वनेवं सवारी साधन, मोबाइल, इलेक्ट्रोनिकया सामान, वसः लिसें उद्योग सञ्चालनया निंतिं विदेशं वइगु कच्चा पदार्थया भाः थहां वनाः उकिया लिच्वः नेपाःया बजारय् लाइ । डलरया भाः थहां वंगुलिं अन्तर्राष्ट्रिय उडानया निंतिं न्यायेमाःगु टिकटया भाः थहां वंगु दुसा नेपाल विद्युत प्राधिकरणं डलर पुलाः न्यानातःगु मतया भाः नं थहां वनीगु जूगु दु ।