थनिंनिसें महर्जन कम्प्लेक्सया बुकिङ्ग सुरु
‘सर्वोच्चया आदेश लिपा कम्प्लेक्स सम्बन्धी विवाद क्वचाल’
येँ – येँया मूबजाः जुयाच्वंगु न्हूसतकय् दयेकाच्वंगु व्यापारिक भवन ‘महर्जन कम्प्लेक्स’य् पसः तयेगु निंतिं थनिंनिसें बुकिङ्ग सुरु जूगु दु । स्वतँजाः दयेके क्वचायेधुंकूगु ‘नियो क्लासिक’ पहया सम्पदामैत्री थ्व व्यापारिक भवनय् खुइकू पसः दइगु खँ कम्प्लेक्सया दयेकाच्वंगु महर्जन विजनेश एशोसियट्सया अध्यक्ष कृष्णलाल महर्जनं कनादीगु दु ।
भाजु महर्जनया कथं १८० निसें ५०० स्क्वायर फुट तकया पसःकू दुगु थ्व भवनय् ब्राण्डेड पसःत लिसें तिसा पसः, फुड कोर्ट, रेष्टुराँ, आइसक्रिम पार्लर, वित्तीय संस्थात दइ । बसन्तपूया गद्दी बैठकया पहलं नियो क्लासिक शैलीं दयेकूगु थ्व भवन पिनें स्वयेबलय् सम्पदामैत्री जुइगु व दुने अत्याधुनिक जुइगु खँ धयादिसें अध्यक्ष महर्जनं भवनय् २४ सै घन्टा ताजा फय् वइकथं दयेकातयागु, पूवंक एयर कन्डिसन जुइगु, अत्याधुनिक क्याप्सुल लिफ्ट, इलिभेटर लिसें पूवंक सुरक्षा व्यवस्था दइगु खँ कनादिल ।
छुं ई न्ह्यव छथ्वसिनं थ्व भवनं यानाः हनुमानध्वाखा लायकू लागाया सम्पदायात हानी याइ धकाः विवाद यानाच्वंगु खःसां आः थ्व विवाद मदयेधुंकूगु खँ अध्यक्ष महर्जनं कनादीगु दु । सर्वोच्च अदालतं छुं ई न्ह्यव थ्व भवन ५३ फिट तक जाः जुइक दयेकेफइ कथं आदेश बीधुंकूगु दु ।
‘येँ नगर पञ्चायतं वि.सं. २०२४ सालय् ५३ फिट जाः जुइक न्यागू तल्ला दयेकेगु निंतिं निर्माण स्वीकृत बियातःगु न्हापा क्रिस्टल होटल तयातःगु साविक कित्ता नं. ९४२ या जग्गाय् दयेकूगु थ्व भवनयात लिपा आवश्यक कथं ५३ फिट तक थहां वने जिइ कथं सम्माननिय सर्वोच्च अदालतं हे कानुनी लँ चायेकाबी धुंकूगु दु’ अध्यक्ष महर्जनं धयादीगु दु ।
नेपाःया हे न्हापांगु नियो क्लासिक शैलीया सम्पदामैत्री भवनय्
१८० निसें ५०० स्क्वायर तकया खुइकू पसः दइगु
भवनयात कयाः जुयाच्वंगु विवादयात कयाः छवाः न्ह्यव येँ जिल्ला प्रशासन कार्यालयय् नं सर्वपक्षीय बैठक जूगु खः । बैठकय् सिडिओ रामप्रसाद आचार्यं सर्वोच्च अदालतं हे ५३ फिट तक थहां वने दइगु आदेश जुइधुंकूगुलिं थ्व भवन आः निर्वाध रुपं संचालन यायेदइगु खँ धयादीगु खः ।
सिडीओ आचार्यं सर्वोच्चं हे ५३ फिट तक दनेजिउगु अधिकार प्रत्याभूत यायेधुंकूगुलिं आः थ्व हे आदेश कथं येँ महानगरपालिकां नक्सा पास यानाः दयेके दइगु खँ धयादीगु खः । थ्व भवन आः ३१ फिटय् स्वंगू तल्ला दयेके क्वचायेधुंकूगु दु ।
उगु बैठकय् उपत्यका विकास प्राधिकरणया प्रतिनिधिं नं सम्पदा क्षेत्रया कोर जोनं पिने बफर जोनय् लाःगु महर्जन कम्प्लेक्स सामान्यतः ४५ फिट दयेके दइगु जूसां साविक २०२४ सालय् हे ५३ फिट नक्सा पास जुइधुंकूगु जूगुलिं ५३ फिट तक हे थप नक्सा पास यानाः दयेके दइगु खँ प्रष्ट यानादीगु खः ।
निर्माण सम्बन्धी मापदण्ड २०६४या दफा ४.४.२ कथं पुलांगु छेँया पुनर्निर्माण यायेबलय् न्हापाया छेँ ३५ फिट स्वयां अप्वः दुसा न्हापाया हे उचाइ कथं दयेके दइगु प्रावधान दु । अथेहे छुं ई न्ह्यव येँ महानगरपालिकां भवन निर्माण मापदण्ड २०७५ पितबिसें बसन्तपूर, स्वयम्भू, बौद्ध, पशुपतिनाथ थेंज्याःगु विश्वसम्पदा क्षेत्रया बफर जोनय् न्हय्गू तल्ला व ६५ फिट तक न्हूगु भवन दयेके दइगु आचारसंहित हःगु खः ।
येँ महानगरपालिकां हःगु थ्व न्हूगु मापदण्डयात कयाः उपत्यका विकास प्राधिकरणं तःगु मुद्दाय् नं सर्वोच्चं वंगु फागुन २८ गते जक अन्तिरिम आदेश जारी यायेम्वाःगु आदेश बीधुंकूगु दु । अध्यक्ष महर्जनं नेपाःया हे न्हापांगु सम्पदामैत्री भवनय् सर्वोच्च अदालतया आदेश कथं हे जक निर्माण जूगु स्पष्ट यानादिसें संविधानं बियातःगु निजी सम्पत्ति सुरक्षा यायेगु अधिकार छुं मनूया कारणं कुण्ठित जूगु खँ धयादीगु दु ।
येँ जिल्ला प्रहरी एसएसपी, सशस्त्र प्रहरीया एसपी, सहायक प्रमुख जिल्ला अधिकारी, पुरातत्व विभागया प्रतिनिधि सहभागी जूगु सर्वपक्षी बैठकय् थुगु भवन थुवाःपिनिगु सम्पत्तिया अधिकार हे हस्तक्षेप याये कथं छुं मनूत सनाजूगुलिं उकिया विरुद्ध महर्जनपिंत ऐक्यबद्धता क्यनेत ज्यापु महागुथि, ज्यापु विकास कोष, ज्यापु समाजया नायःपिंलिसें कलाकार, पत्रकारपिं नं बैठकय् उपस्थिति जूगु खः ।
LEAVE YOUR COMMENTS