चिधंपिं व्यापारित नं भ्याटय् दर्ता जुइमाःगु व्यवस्था बारे अर्थमन्त्रीयात गुनासो प्वंकल

येँ – चीधंपिं व्यापारीतय्त नं मूल्य अभिवृद्धि कर (भ्याट)य् अनिवार्य दर्ता यायेमाःगु व्यवस्थायात कयाः नेपाल उद्योग वाणिज्य महासंघं अर्थमन्त्री डा. युवराज खतिवडायात नापलानाः गुनासो प्वंकूगु दु ।

महासंघया उपाध्यक्ष किशोर प्रधानया नेतृत्वय् वंगु पुचलं अर्थमन्त्री खतिवडायात नापलासें चिधंपिं व्यापारीत नं अनिवार्य भ्याटय् दर्ता यायेमाःगु कारणं खनेदुगु समस्या ज्यंकेत इनाप यानादीगु खः ।

सिलाई व ब्युटिपार्लर थेंज्याःगु चिचिधंगु व्यवसाय तकं भ्याटय् दर्ता यायेमाःगु व्यवस्थां थज्याःगु पेशा हे तनावनीगु खँ न्ह्यथँसें प्रतिनिधिमण्डलं सरकारया निर्णय पुनःबिचाः यायेत इनाप याःगु खः ।

अर्थमन्त्रीयात नापलाःगु पुचलं थज्याःगु व्यवसायय् सीमाया आधारय् भ्याट दर्ताया व्यवस्था यायेत इनाप याःगु खः । अथेहे घरेलु तथा साना उद्योग विभाग अन्तर्गतया महिला उद्यमशीलता विकास कोषया बजेट म्हो याःगु खँय् नं प्रतिनिधिमण्डलं चिन्ता प्वंकूगु खः । थ्व कोषपाखें त्यासा कयाः महिला उद्यमीतय् व्यवसाय विकास व विस्तार यायेत ग्वाहालि जुयाच्वंगु खँ न्ह्यथसें थुगु कोषया ध्यबा अप्वयेकेत नं माग याःगु खः । अर्थ मन्त्री खतिवडां चिधंपिं व्यवसायीत नं भ्याटय् दर्ता जुइमाःगु व्यवस्थां जुयाच्वगु समस्यायात कयाः मन्त्रालयं फक्व ध्यान बीगु आश्वान बियादीगु खः ।