ने. सं. ११४६ तछलाथ्व षष्ठी - सिथि नखः कुमार षष्ठी

येँ व यलय् ५म्ह नापं थप ४५१म्हेसित कोरोना संक्रमण

येँ – नेपालय् थप ४ सय ५१म्हेसित कोरोनाया संक्रमण जूगु दु । स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं वंगु नीप्यघौया दुने ४ सय १६म्ह मिजंत व ३५म्ह मिसातय्त संक्रमण जूगु पुष्टि यानादीगु दु । थ्व नापं नेपालय् संक्रमिततय् ल्याः ६ हजार २ सय ११म्ह थ्यंगु दु ।

अथे संक्रमित जूपिं मध्ये ४म्ह येँया व १म्ह यलया जूगु खँ मन्त्रालयं पुष्टि याःगु दु । धुलिखेल अस्पतालय् याःगु परीक्षणय् येँया १म्ह मिजंयात संक्रमण पुष्टि जूगु खः । अथेहे सुक्रराज ट्रपिकल अस्पतलय् याःगु परीक्षणय् येँया १म्ह मिजंतय्त संक्रमण खनेदुगु खः । पाटन अस्पतालय् याःगु परीक्षणय् येँया २म्ह मिसा व यलसया १म्ह मिसायात संक्रमण खनेदुगु खः ।

कोरोनाया संक्रमण नेपाःया ७३गू जिल्लाय् थ्यंगु दु ।