यलया ऐतिहासिक अदालत भवन पुनःनिर्माण शुरु

यल(नेपालभाषा टाइम्स)- विश्व सम्पदाया धलखय् दुथ्यानाच्वंगु थनया लाय्कू लागाया ऐतिहासिक अदालत भवन पुनःनिर्माणया ज्या शुरु जूगु दु । विश्व सम्पदा क्षेत्र दुनेया थुगु भवन मोहनि, स्वन्ति नखः धुनेवं दयेकेगु योजनाकथं पुनःनिर्माणया ज्या न्ह्याःगु खः ।

भारतीय दूतावासया ग्वाहालिइ पुनःनिर्माण जुइत्यंगु अदालत भवनया पुनःनिर्माण पचलि भैरव निर्माण व्यवसायी कम्पनीं यायेत्यंगु खः । भवन झिंच्यालाया दुने पुनःनिर्माण याये क्वचायेकेगु लक्ष्य कयातःगु दु ।

१९०० सालय् तःभुखाय् ब्वये न्ह्यः स्वतँ जाःगु ऐतिहासिक अदालत भवन पुलांगु हे संरचनाय् पुनःनिर्माण यायेत्यंगु उगु भवनय् पाटन संग्रहालयया ज्याकू तये फइगु दरवार संग्रहालयया प्रमुख सुरेशमान लाखें कनादीगु दु । ‘तःदँ तकया प्रतीक्षा लिपा तसकं जीर्ण अवस्थाय् थ्यनेधुंकूगु भवन पुनःनिर्माण शुरु जूगु दु । आः पुलांगु शैलीं पुनःनिर्माण यायेधुंकाः यल लाय्कू लागाया स्वरुप हे बिस्कं जुइ’, वय्कलं धयादिल ।

करिब १८ करोड लागतय् उगु भवन पुनःनिर्माण यायेत्यंगु खः। जीर्ण अवस्थाया भवन दुने च्वंगु महत्वपूर्ण व मेमेगु ज्वलंत सुरक्षित थासय् ल्ह्ययेगु ज्या जुइधुंकूगु दु ।उगु ऐतिहासिक अदालत भवन २०७२ सालया भुखाय् लिपा झन जीर्ण जुजुं वनाच्वंगु खःसा लिपांगु इलय् प्रयोगविहीन अवस्थाय् दुगु खः ।