‘युरेनियम’ सहित कांग्रेस कार्यकर्ता ज्वन

येँ – येँया बौद्धं प्रहरी ‘युरेनियम’ कारोबार याःगु आशंकाय् च्याम्हेसित ज्वंगु दु । बौद्धया छुं मनूत थीथी पुचः दयेकाः युरेनियम संकलन व भण्डारण यानाः थिकेगु भावं मीत्यंगु सुचं वयेवं महानगरीय प्रहरी वृत्त बौद्धया प्रहरीं ज्वंगु खःसा प्रहरी प्रधान कार्यालयं तकं सादा पोशाकय् प्रहरी परिचालन याःगु खः ।

प्रहरी युरेनियम मालेगु झ्वलय् हयात रिजेन्सी होटेलया कार पार्किङ यायेगु थासय् पार्किङ यानातःगु अवस्थाय् बा. ५ च ८२०९ नम्बरया कार दुने २ किलो ८०० ग्राम तौल दुगु युरेनियम धाःगु धातु सहित भुपेन्द्र खड्का व नवराज महतयात ज्वंगु खः ।

न्यनेकने यायेगु झ्वलय् उमिसं उगु युरेनियम थेंज्याःगु धातु भारतं हयाः प्रतिकिलो ३५ करोड तकां मीत्यंगु खँ प्रहरीं धाःगु दु । उकिया नितिं उमिसं छुं मनूत लिसे खँ ल्हायेधुंकूगु खः । ज्वंपिं मध्ये छम्ह नेपाली कांग्रेस यलया नेता नवराज महत तकं जूगु खँ प्रहरीं धाःगु दु । महत यल क्षेत्र नम्बर ३ (१) पाखें प्रदेशसभाया उम्मेदवार जूम्ह खः । ज्वंपिं रामकृष्ण लामिछाने, गोपीलाल दास, नारायण यादव, सुरेन्द्रप्रसाद चौधरी व निम्ह भारतय् नागरिक उपेन्द्रकुमार मिश्र व राजु ठाकुर खः ।

तर प्रहरीं उगु धातु युरेनियम खः कि मखु धइगु पुष्टि मजूनि धासें उकियात प्रयोगशालाय् परीक्षण यायेमानिगु खँ धाःगु दु । थ्व स्वयां दछि न्ह्यः नं प्रहरीं बौद्धं २ केजी युरेनियम थेंज्याःगु धातु सहित प्यम्हेसित ज्वंगु खः ।

सम्बन्धित बुखँ

LEAVE YOUR COMMENTS