यल महानगरपालिकापाखें नं फुटबल क्लबतय्त ग्वाहालि

यल –  यल महानगरपालिकां यलय् सक्रिय जुयाच्वंगु फुटबल क्लबतय्त आर्थिक ग्वाहालि बिउगु दु । यल मनपां न्यागू ‘ए’ डिभिजन क्लब, प्यंगू बी डिभिजन क्लब व निगू सी डिभिजन क्लबयात आर्थिक ग्वाहालि याःगु खः । यल महानगरपालिकाया मेयर चिरिबाबु महर्जनं छगू ज्याझ्वःया दथुइ फुक्क क्लबतय्त यानाः ६१ लाख तका लःल्हानादीगु खः ।

ए डिभिजन क्लबतय्त म्हतिं प्यंगू–प्यंगू लाख, बी डिभिजन क्लबयात स्वंगू स्वंगू लाख व सी डिभिजन क्लबयात निगू निगू लाख तका ग्वाहालि बिउगु दु । ए डिभिजनपाखें थ्री स्टार, जावलाखेल, फ्रेन्डस क्लब, च्यासल युथ क्लब व ब्रिगेड ब्वाइज क्लबयात दां लःल्हाःगु खः । अथेहे थ्रीस्टार क्लबयात यल मनपां थप नीच्यागू लाख तका दां नं बिउगु खः ।

वंगु दँय् थ्रीस्टार क्लब म्हितूगु झिंखुगू धेंधेंबल्लाः मध्येय् न्हयगू उपाधी त्याकाः यल जिल्लाया हे नां तःगु धासें छगू उपाधीया प्यंगू लाखया ल्याखं नीच्यागू लाख तका दां बिउगु खः ।बी डिभिजन पाखे सातदोबाटो युथ क्लब, खुमलटार युथ क्लब, झम्सिखेल युथ व पुल्चोक युथ क्लबयात दां बिउगु खः ।

अथेहे सी डिभिजनपाखे खालीबारी युथ क्लब व सानेपा युथ क्लबयात दां लःल्हाःगु खः । यल मनपाया मेयर महर्जनं फुटबल विकासया निंतिं महानगरपाखें ग्वाहालि यानागु धासें थुकिं फुटबलया विकासय् ग्वाहालि जुइगु विश्वास प्वंकादीगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन