श्रम स्वीकृतया खँय् विवाद

येँ – श्रम, रोजगार तथा सामाजिक सुरक्षा मन्त्रालयं भारतीय नागरिकयात अनिवार्य श्रम स्वीकृति कायेमाः धाःगु खँय् विवाद ब्वलंगु दु ।
मन्त्रालयया शाखा अधिकृत प्रशान्त शाहं जारी याःगु सर्कुलर प्रति उगु हे मन्त्रा–लयया सहसचिव रामप्रसाद घिमिरें आपत्ति प्वंकूगु खः । सहसचिव घिमिरेया कथं भारतीय ज्यामियात श्रम स्वीकृति अनिवार्य मदु ।

घिमिरें मन्त्रालयया लेटरप्याडय् हे जारी याःगु खण्डन विज्ञप्तिइ ‘नेपाःया उद्योग प्रतिष्ठानय् ज्या याइपिं भारतीय नागरिकयात अनिवार्य श्रम स्वीकृत कायेमाःगु खँय् छुं हे सत्यता मदु’ धयातःगु दु । सचिव घिमिरें ऐन नियम व व्यवहारय् तकं लागू मजूगु खँ पिने हयेगु गलत जूगु धासें उगु विषय पिने हःम्ह कर्मचारीयात मन्त्रालयय् सःताः स्पष्टीकरण कायेगु तयारी जुयाच्वंगु खँ नं धयादीगु दु ।

सूत्रया कथं नेपालय् भारतीय नागरिकयात अनिवार्य श्रम स्वीकृत कायेमाःगु ऐन व व्यवहारय् तकं लागू मदुसा तत्कालया निंतिं अज्याःगु छुं योजना नं मदु । श्रम मन्त्रालयं धाःसा सहसचिव घिमिरें भारतीय नागरिकयात अनिवार्य श्रम स्वीकृत कायेम्वाः धाःसां उकिया निंतिं प्रधानमन्त्री कार्यालयं हे निर्देशन वःगु खँ धाःगु दु ।

वंगु पुस २६ गते प्रधानमन्त्री कार्यालयं पौ वःगु व उगु हे पौया आधारय् शाखा अधिकृत प्रशान्त शाहं अनिवार्य श्रम स्वीकृत कायेत सर्कुलर याःगु खः ।