सुर्खेतय् सीम्ह मिजंयात कोरोना पुष्टि, सीपिं ११म्ह थ्यन

येँ – कोरोना भाइरसया कारणं थप छम्ह मनू सीगु दु । सुर्खेतया पञ्चपुरी नगरपालिका-१ हाँसे गाँया २०दँया मिजं कोरोनाया कारणं सीगु पुष्टि कर्णाली प्रदेशया सामाजिक विकास मन्त्रालयं याःगु दु ।

शुक्रवाः छगू विज्ञप्ति पिथंसें कर्णाली प्रदेशया स्वास्थ्य सेवा महाशाखाया प्रमुख डा. लक्ष्मीनारायण तिवारीं २०दँया मिजं काेराेनाया कारणं हे सीगु पुष्टि यानादीगु खः । जेठ ८ गते भारतं लिहांवम्ह उम्ह मिजं स्थानीय विद्यापुरस्थित जनता मावि क्वारेन्टाइनय् च्वनाच्वंम्ह खः । अन वया आरडीटी चेक याःगु इलय् नेगेटिभ वयेवं जेठ २१ गते छेँ छ्वःगु खः ।

तर छेँ वंगु कन्हय् कुन्हु उम्ह मनू मदुगु खः । वयां लिपा वया स्वाब संकलन यानाः प्रदेश अस्पतालया प्रयाेगशालाय् छ्वःगु खः । परीक्षणया रिपोर्ट पोजेटिभ वःगु खः । थ्वनापं नेपालय् काेराेनाया कारणं सीपिं ११म्ह थ्यंगु दु ।