स्वनिगलय् खतरा अप्वल, कोरोना संक्रमणय् स्थानीयवासीत नं धमाधम पोजिटिभ

येँ (नेपालभाषा टाइम्स) – स्वनिगलय् कोरोना भाइरस संक्रमित मनूत लुइगु क्रम न्हियान्हिथं अप्वया वनाच्वंगु दुसा सरकारं धाःसा थुकी अझ नं माक्व ध्यान बी फयाच्वंगु मदुनि । थुकिं यानाः आः राजधानीइ कोरोना संक्रमणं विष्फोटक रूप काये फइगु तकया ग्याःचिकु ब्वलना वःगु दु ।

येँया नुगःचु थें जुयाच्वंगु असं लागाया जःखः हे संक्रमित जूपिं मनूत लुया वयेवं येँय् थुकथंया आतंक ब्वलंगु खः । असंया लिक्कसं कुनां त्वालय् बालं च्वनाः महाबौद्धय् पसः तयाच्वंपिं छगू हे परिवारया न्याम्ह दुजःयात कोरोना खने दयेवं येँय् भयावह जुइगु स्थिति खने दुगु खः । उपिं निवाः न्ह्यः जक भारतया सीतामढीं लिहां वःपिं खः । उकथं हे येँया ज्याथाय् छम्ह स्थानीय मनूयात नं कोराना जूगु दु। उम्ह स्थानीय नं छुं न्हिं न्ह्यः जक थः अबुयात वासः याकेगु बारे भारतय् सल्लाह यानाः लिहां वःम्ह खः । उकथं हे येँया न्हाय्कं त्वालय् छेँ जुयाः भोताहितिया तू क्यब (फलफूल गल्लीइ) कोल्ड स्टोर पसः तयाच्वंम्ह छम्ह स्थानीय मनूयात नं संक्रमित पुष्टि जुइधुंकाः दुसा वयात आः टेकु अस्पतालय् भर्ना यानातःगु दु। तर वयात गुकथं ल्वय् पुन धइगु खँ धाःसा सीमदुनि ।

येँया असं व महाबौद्ध आपालं पिनेयापिं मनूत वये–वने याइगु थाय् खः । थज्याःगु थासय् हे कोरोना जूपिं मनूत खने दया वःगुलिं थ्व ल्वय् तचाः जुइक हे न्यना वंगु दयेमाः धकाः अनुमान याना हःगु दु। अन खास यानाः भारतीय व्यापारीतय्सं ल्वय् पुंकूगु अनुमान याना हःगु दु। थुकिं यानाः समुदायस्तरय् ल्वय् न्यना वने फइगु ग्याःचिकु ब्वलंगु खँ नं धाःगु दु ।

थ्वहे झ्वलय् स्वनिगः दुहां वयेगु प्रमुख नाकाय् सवारी साधनयात कडाई याःसां न्यासि वइपिंत धाःसा पने मफयाच्वंगु खँ धाःगु दु। अन गाडीइ च्वनाः वइपिं मनूत चेकजाँच याइगु नाका स्वयां न्यासः मिटर न्ह्यःने हे गाडीं कुहां वनाः नाका पार यायेगु ज्या यानाच्वंगु दु। अथे न्यासि वइपिं मनूत अःपुक हे दुहां वःसां प्रहरी प्रशासनं धाःसा मखंछु यानाच्वंगु दु ।

सरकारी अधिकारीतय्सं धाः कथं नाकाय् गाडीयात कडाई याःसां न्यासि वनीपिं पनेगु धइगु निर्देशन मदुगुलिं प्रहरीं मपंगु खँ धाःगु दु। गृह मन्त्रालयं पास मदयेक सुं नं मनूयात दुकायेमते धकाः निर्देशन बियातःगु खँ धाःगु दु ।

थ्वहे झ्वलय् सरकारं स्वनिगः दुहां वइगु थीथी नाकाय् कोरोना भाइरसया स्वाब संकलन यानाच्वंगु दुसा थ्व ज्या नं व्यवस्थित मजूगु खँ सीदुगु दु। स्वाब संकलन यायेगु थासय् आपालं भीडभाड जुयाः झन जक संक्रमण अप्वये फइगु खँ स्वास्थ्यकर्मीतय्सं धाःगु दु। म्हिगः जक स्वनिगलय् थप १५ म्हेसिके कोरो ना पोजिटिभ खने दुगु दु ।

सम्बन्धित बुखँ

LEAVE YOUR COMMENTS