माओवादी अध्यक्षय् हाकनं दाहाल

येँ – नेकपा माओवादी केन्द्रया च्याक्वःगु महाधिवेशन लिपा च्वंगु केन्द्रीय कमिटी बैठकं अध्यक्षय् पुष्पकमल दाहालयात निर्वाचित याःगु दु । म्हिगः यलया सानेपाय् च्वंगु न्हापांगु बैठकय् नेता नारायणकाजी श्रेष्ठं याःगु प्रस्तावय् कृष्णबहादुर महरां समर्थन याःगु खःसा दिनानाथ शर्मां दाहाल सर्वसम्मतं निर्वाचित जूगु घोषणा याःगु खः ।

अध्यक्षय् निर्वाचित जुइवं दाहालं महत्वपूर्ण इलय् थःत हाकनं छक्वः पार्टीया नेतृत्व यायेगु जिम्मेवारी वःगु खँ धयादीगु खः । दाहाल वंगु स्वंगू दशक स्वयां न्ह्यवनिसें माओवादीया अध्यक्ष जुया वयाच्वनादीगु दु ।

माओवादी केन्द्रया च्याक्वःगु अधिवेशन आइतवाः क्वचाःगु खः । महाधिवेशनं केन्द्रीय दुजःत ल्यःगु खः । सोमवाः केन्द्रीय दुजःपिनि शपथ ग्रहणया झ्वलय् अध्यक्षया निंतिं विधान कथं दाहालया नां प्रस्ताव याःगु खः ।

महाधिवेशनं थ्व पालं निसें झिंन्याम्ह पदाधिकारीतय्गु नं क्वःछिउगु खः । तर पदाधिकारीत धाःसा ल्यःगु मदुनि । केन्द्रीय दुजःपिनि पाखें हे पदाधिकारीत ल्यइगु जुइ । माओवादीइ छम्ह अध्यक्ष, छम्ह वरिष्ठ उपाध्यक्ष, खुम्ह उपाध्यक्ष, छम्ह महासचिव, निम्ह उपमहासचिव, स्वम्ह सचिव व छम्ह कोषाध्यक्ष तयेगु प्रावधान हःगु खः ।

आः अध्यक्ष धुंकाः दकलय् शक्तिशाली जुइगु महासचिव पदय् सु वइ धयागु चर्चा जुयाच्वंगु दु । महासचिवय् कृष्णबहादुर महरा, वर्षमान पुन, जनार्दन शर्मा व पम्फा भुसालया दावी दु ।

सम्बन्धित बुखँ

LEAVE YOUR COMMENTS