मचा म्येँ एल्बम ‘नन्दिता गुनगुन’ विमोचन
येँ – मचा म्येँ हालामि नन्दिता राज वैद्यया नेपाली भाय्या एल्बम ‘नन्दिता गुनगुन’ व उकी दुथ्याःगु म्येँ ‘पुतलीका नाना..’या म्युजिक भिडियोया विमोचन जुल । शनिवाःछगू ज्याझ्वःया दथुइ मू पाहाँ वाङ्मय पुरूष सत्यमोहन जोशी, नेपाल विद्युत प्राधिकरणया कार्यकारी निर्देशक कुलमान घिसिङ, नृत्य निर्देशक समाजया नायः भुवन श्रेष्ठ, म्युजिक नेपालया निर्देशक सन्तोष शर्मा, नन्दिताया मांअबु रिता नेम्कुल वैद्य व नन्दन राज वैद्य, म्युजिक भिडियो निर्देशक प्रदीप श्रेष्ठं, प्रिमियर इन्टरनेशन स्कुलया प्रिन्सिपल पवित्रा लिम्बुं मंकाः कथं विमोचन यानादीगु खः ।
ज्याझ्वलय् न्ववानादिसें एल्बमया उत्पादक, बजार व्यवस्थापक व प्रवद्र्धक म्युजिक नेपालया सन्तोष शर्मां थः मचाया प्रतिभा म्हसिका प्रोत्साहन यानाबिउपिं मांअबुयात सुभाय् बीमाःगु बिचाः तयादिल । थुगु म्येँचाया प्रस्तुतकर्ता नन्दिताया मांअबु नन्दनराज व रिता खः ।
अथेहे ज्याझ्वलय् न्ववानादिसें प्रिमियर इंग्लिस स्कुलया प्रिन्सिपल लिम्बूं न्ह्याम्हं मस्तय्सं छगू न छगू प्रतिभा ज्वनावइ, वयात दकलय् न्हापा वया अभिभावकं म्हसिके फइ धासें थ्वज्या नन्दिताया मांअबुं याःगु धासें बधाइ बियादिल ।
नृत्य निर्देशक संघ नेपालया व्यवस्थापनय् जूगु ज्याझ्वलय् नन्दितां म्येँचालय् दुथ्याःगु थीथी म्येँ न्यंकादीगु खः ।
थ्व म्येँचाकय् संगीत गुरुदेव कामत, उत्तम थापामगरया दुसा म्येँ गणेशराज वैद्य अपार, डिपि खनालपिंसं च्वयादीगु खः ।
नन्दिता बाल कवि गणेश अपारया छय् खः ।
LEAVE YOUR COMMENTS