खुल्ला मञ्चय् शटर पिकाःगु विरुद्ध प्रदर्शन

येँ – येँया रत्नपार्कय् च्वंगु बसपार्क व्यवस्थापनया ठेक्का तयातःगु ठेकेदार कम्पनीं अन बालं बीगु ताः तयाः शटर पिकाःगु विरुद्ध थौं स्थानीय जनतां धर्ना बिउगु दु । खुल्ला मञ्च बचाउ अभियानया आह्वानय् खुल्ला मञ्चय् जुयाच्वंगु अतिक्रमणया विरोध यासें प्रदर्शन याःगु खः । भुखाय् लिपा जोखिम व्यवस्थापनया निंतिं तसकं आवश्यक जूगु खुल्ला व सार्वजनिक लागा अतिक्रमण पनेमाःथाय् अःखतं झन् अतिक्रमण अप्वयावंगु धासें सयौं स्थानीय जनता धर्ना ज्याझ्वलय् सहभागी जूगु खः । खुल्ला मञ्चय् ठेकेदारं छगू शटरया खुगू लाखंनिसें झिंन्यागू लाख तक कयाः मियाच्वंगु व उकिया बाः खुद्वःनिसें नीद्वः तक क्वःछिनातःगु खँ धाःगु दु । ठेकेदार कम्पनीं अग्रिम भुक्तानी कयाः उगु शटर मीगु ज्या यानाच्वंगु खँ सम्बन्धित व्यापारीतय्सं धयाच्वंगु दु ।

मेखे येँ महानगरपालिकां प्रवक्ता ईश्वरमान डंगोलं उगु शटर पिकायेगु ज्याय् महानगरया छुं संलग्ना मदु धासें छुं न्हिया दुने उगु शटर थुनेगु खँ धयादीगु दु ।

प्रवक्ता डंगोलं ठेकदार कम्पनी जलेश्वर स्वच्छन्द विकोई विल्डर्स नाप बसपार्क व्यवस्थापन यायेगु जक सम्झौता जूगु धासें शटर तयेगु ज्या कानुनसम्मत मजूगुलिं थुनेत सहलह जुयाच्वंगु खँ ‘नेपालभाषा टाइम्स’ यात कनादीगु दु । कानुनसम्मत मजूगु संरचना डोजर यंकाः थुनेगु जुइ धासें गलत मनसायं दयेकूगु संरचनायात थःपिंसं मान्यता बी मफइगु खँ नं वय्कलं स्पष्ट यानादिल ।

मेखे अन दयेकाच्वंगु संरचनायात कयाः २८ वडाया वडाध्यक्ष भाइराम खड्गीं येँ मनपायाके बसपार्कय् दयेकाच्वंगु संरचनाया बारे थःगु वडायात छुं हे जानकारी मदु धासें येँ मनपायाके जानकारी माग यानादीगु दु । वय्कलं छगू पौ च्वयाः उगु जानकारी माग यानादीगु खः ।
वडाध्यक्ष खड्गी थम्हं येँ मनपाया मेयर व प्रवक्तालिसे खँ ल्हानागु इलय् बसपार्क व्यवस्थापन यायेगु झ्वलय् अन छगू ट्वाइलेट, प्रतिक्षालय, बाथरुम व वासः पसः तयेत संरचना दयेकेगु स्वीकृत बिउगु खःसां शटर हे तयेगु कथं स्वीकृत मबियागु जानकारी बिउगु खँ ‘नेपालभाषा टाइम्स’ यात कनादिल ।

थ्वहे झ्वलय् नेपाली कांग्रेसपाखें खुल्ला मञ्चय् जुयाच्वंगु थ्व अवैध ज्याया विरोधय् पार्टीगत रुपं हे न्ह्यःने वयेगु तयारी जुयाच्वंगु खँ सीदुगु दु । कांग्रेसया येँ महानगर कमिटी व थन च्वंपिं सांसदतय्सं नं थुकी रुची तयाः सहलह ब्याकेगु शुरु याना हःगु खँ सूत्रं धाःगु दु ।