सरकारया सच्छिन्हु : ‘जनतां महसुस याइकथं ज्या जूगु मदु’
येँ (नेपालभाषा टाइम्स) – प्रधानमन्त्री बालेन साहया नेतृत्वय् सरकार नीस्वंगु सछिन्हु क्यंगु दुसा सरकारया ज्यायात कयाः मूल्यांकन यायेगु ज्या नं न्ह्याःगु दु । थ्वहे झ्वलय् श्रम संस्कृति पार्टीया अध्यक्ष हर्क साम्पाङं सरकारं सछिन्हुया दुने जनतां महसुस याइ कथं ज्या याये मफुगु खँ धयादीगु दु । म्हिगः त्रिभुवन अन्तर्राष्ट्रिय विमानस्थलय् सञ्चारकर्मीत लिसे खँ ल्हायेगु झ्वलय् वय्कलं उगु खँ धयादीगु खः ।
वय्कलं सरकारं सछिन्हुया दुने छुं यायेगु कुतः याःगु खःसा नं जनतां महसुस याइकथं लिच्वः बीमफुगु खँ धयादीगु खः । वय्कलं बेसाः भाः थिके जूगुलिइ उकियात नियन्त्रण यायेत थम्हं सरकारयात सुझाव बिया वयाच्वनागु खःसां नं जनतां महसुस याइकथं ज्या मजूगु धासें लिपांगु इलय् पेट्रोलियम पदार्थया भाः क्वःकाःगुयात धाःसा थम्हं उगु लसकुस यानागु खँ नं धयादीगु दु ।
अथेहे नेकपा एमालें प्रधानमन्त्री साहया सछिन्हुया कार्यकाल पूवंगु न्हियात कयाः थःपिनिगु प्रारम्भिक धारणा सार्वजनिक याःगु दु । महासचिव शंकर पोखरेलं म्हिगः विज्ञप्ति जारी यानाः साह नेतृत्वया सरकार सुशासन व शासकीय सुधारया दृष्टिकोणं पूर्णतः असफल जूगु खँ धाःगु दु ।
महासचिव पोखरेलं जारी याःगु विज्ञप्तिइ धयातःगु दु, ‘प्रधानमन्त्री व मन्त्रीया निजी सचिवालय हे आर्थिक स्वार्थ व भ्रष्टाचारया घटनाय् प्रत्यक्ष स्वानाच्वंगु प्रमाण छगू लिपा मेगु सार्वजनिक जुयाच्वंगु दु । थःगु १०० बुँदे वाचापत्र व आम जनताया अपेक्षा कथं ज्या यायेगु पलेसा दंगु चर्चा व विवादस्पद निर्णयय् जक सरकारया रुचि खनेदु ।’
उकथं हे नेपाली कम्युनिष्ट पार्टीया नेता लिसें सांसद वर्षमान पुनं सरकारया सछिन्हुया ज्या निराशाजनक जूगु खँ धयादीगु दु । नेपालभाषा टाइम्स लिसे खँ ल्हायेगु झ्वलय् वय्कलं कर्मचारी व सरकारया दथुइ हे विश्वासया संकट खनेदुगु धासें धयादिल, ‘सरकारं सुशासनया नारा बिउथें कर्मचारीया विश्वास काये फयाच्वंगु मदु । अले थम्हं घोषणा याःगु सछिन्हुया सछि ज्याया बछि नं ज्या याये फयाच्वंगु मदु ।’
उकथं हे वय्कलं स्थापित संविधानया अःखः प्रदेशसभा खारेज यायेगु सत्तारुढ पार्टीया निर्णयं संविधान हे खतराय् लाइगु बिचाः नं तयादीगु दु । वय्कलं वर्तमान सरकारं प्रतिशोधात्मक ज्या यानाच्वंगु नं द्वपं नं बियादीगु दु ।
उकथं हे नेवाः न्ह्यलुवा लिसे नेपाली कम्युनिष्ट पार्टी हेडक्वार्टर दुजः राजेन्द्र श्रेष्ठं नं थ्यमथ्यं निगू तिहाइ बहुमत हःगु सरकारयात जनतां आशा व भरोसा याःगु खःसां नं उगु कथं ज्या जुइमफुगु खँ धयादीगु दु ।
नेपालभाषा टाइम्स लिसे खँ ल्हायेगु झ्वलय् वय्कलं धयादिल, ‘सर्भिस डेलिभरी जुयाच्वंगु मदु, सुशासनया नारा बियाः छुं छुं नेतातय्त ज्वनेगु बाहेक परिणाममुखी ज्या याये फयाच्वंगु मदु । निजी क्षेत्रं विश्वास यायेगु वातावरण दयाच्वंगु मदु । समग्रय् धायेगु खःसा सछिन्हुया ज्या मूल्यांकन याये बहःमजू ।’
मेखे पुलांम्ह प्रधानमन्त्री डा. बाबुराम भट्टराईं धाःसा सछिन्हुया दुने न्हूपिंसं गुलि ज्या यायेमाःगु खः उलि यानाच्वंगु धासें आः हे अविश्वास यायेमाःगु अवस्था मदुगु खँ धयादीगु दु ।
LEAVE YOUR COMMENTS